Bann zindiin lamérik té i viv in manièr avan bann kolon lérop larivé ; zot té i sas ; té i pès, zot té i boukane zot viann, minm zot somans po zot arplanté zot té i koné konserv sa din ané sir lot, minm si i fé fré minm si i fé so ; zot navé poin kouran léktrik, poinn frigo, poinn télé, minm poin zalimèt, la bouzi ou pétrol ; pourtan zot té i viv biin, zot té éré konmsa, dan la foré, la préri…

Si lo tan la sanzé, progrè lanni –radio, satélit, lésans, voitir, bato a motèr, transpor par ér, par mèr –nou pé giny linstriksyon lékol po avans ék bann progrè téknik, fo ni mazine (anfin nout bann résponsab politik tout nivo, lokal, rézional, nasyonal), koman i fo fé po bann moun dan lavnir minm si lé an vil i giny viv éré.
Alors, kèl lé méièr loto partikilié, si ou na in milion moun, i fo fèr nir in million loto ! Zot la kalkilé la polisyon !? Lé pa méièr transpor an komin ; ou na énèrzi solèr po pa gaspi produi pétrolié i donn bon pé gaz éfé d sèr.

Ou na transpor par lo ray, lo trin si ou préfèr ; an vil i apèl sa lo tram ; fé pas a li o milié la ri ; an plin èr, kalkil pa soutérin, lé ankor pli sèr po fé !
Zordi bann gran vil dan lo monn (Méksiko, Santiago, lo Caire (Ezypt), Shangaï…é dot) i koné pi ék lo brui, lo soup do poi (brouyar), koman i fé po artrouv in méyèr èr po réspiré.
Talèr dolo minm i trouv ar pi an bone kantité é an bone kalité.
Lontan nou té viv binn, po nout zanfan domin i fo ni kalkil koman nou sar fé po zot osi i viv biin !

 Justin