Matant Zélida la ékrir Justin :

Mon shèr nové, mon spès salté, rouj-de-fon dovan l’étèrnité, si mi konpran bien na arienk lé z’ot lé konm i di koronpi. Bann rouj lé pa koronpi zot, zot i fé sanblan. Pars mon névé, vi konpran bien kan i pass sétaki lo doi na la kol dési. Pa plis inn ké l’ot ! Rouj, blé, zone, tout demoun lé parèy é kan zot i di ké la nouvèl rout sé in foir d’anpoign, mi pans si zot osi l’avé lo pouvoir, noré fé lo mèm wat-watya, lo mèm foir d’anpoign. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr, vi étone amoin kan vi di sa, pars mi pans avèk lo tonaj la rolijyon ké ou nana zamé ou té i sar di in n’afèr konmsa. Pars l’arzan sa in n’afèr i sar pa rode aou sa, sé désèrtin moun k’i sar rode ali. I sava d’otan pli rod ali ké désèrtin la fé d’promès. Désèrtin i pé avoir di, si ou i ède amoin bate Paul Vergès mi oblira pa ou. Mé pa obliyé, pou in pé, sa i kont an bon l’arzan, an moné sonant épi trébishant.. Sa i kont pa an promès an l’èr. Avèk sa, konm di kréol, i sar pa la boutik !

Mé promès inn, promès l’ot, promès in n’ot i ariv l’èr in pé i rod pous z’ot kamarad dan la kivète. Moin lé sir in pé la di dir, avèk sa moin lé rish pou la vi. Mé z’ot kamarad la di la mèm shoz é zot la pans arienk ranpli z’ot posh azot pa sète lé z’ot. Ala ké lo moman l’arivé é shakinn la fine prépar ali pou so konba la, so konba k’i fo pa pèrd ditou. Kamiyon l’ashté an poundyak ébin sa i fo fé roulé é pa a vid, pa pou la po graton. L’èr-la shakinn i dovien l’ènmi lé z’ot é konm lo mafia lé pa bien roganizé, la i koné pi ki k’i pèrd, k’i k’i gingn, la displine lé mor dsou pyé kamélya.. Lorské l’arzan paré ! tok ! Pran sa pou ou !