Mézami zordi mi yèmré anparl azot in kozman mi panss mwin la fine partaz avèk zot déza. Sé t’in provèrb, biensir, in kozman dan touléka, é sirman ossi kékshoz i fé rofléshir anou sirtou koméla kan wi sava manz dann in réstoran ou lé a d’mandé si bato dori dopi lontan la pankor rante dann Por, si la pèrsone la koupe la vyann la pa koupe an mèm tan son doi, si luil la pa parti alékonomi. Tanka piman antanssion sila pa ansèrv piman skorpion pars sète-la sé malèr d’in sor.

Toussa pou dir azot lo tan koméla sé in tan la péniri par rapor lo tan d’lontan. In tan té pa konmsèk ni koné koméla. Dann tan, si ou téi ansèrv aou in piton d’ri, in platré lo grin, épi inn bone doz kari la vyande lo réstoratèr téi ri avèk ou é si koméla ou lé riskab pass pou in gourman dann tan ou téi pass pou in bon kliyan tou sinploman.

Mi koné pa kossa zot i anpanss de sa, si zot i oi lé shoz konm mwin, mé mi pé dir azot mi kite azot rofléshi la dsi é ni rotrouv pli dvan sipétadyé.

Justin