Médame, Méssyé, la sossyété, koze èk mwin sé koze èk in kouyon, mé sé o pyé d’lo mir k’i oi lo masson. Mézami zot i koné kozman mwin la marke an-o la, mi ansouvien mon famiye téi di sa, néna lontan é mèm pli lontan ké lontan.. Mwin l’avé déza mé konéssans mé la pa pou sa sé yère. Mi rapèl étan jenn marmaye avèk nout papa nou la parti rode in léstré d’néssans laba Sin-jo é fransh vérité loto-la la done anou soussi mé tazantan li téi done pou krazé. L’èrla mon papa téi di : « Loto i manze zaran. ». Mi koné pa si zot i oi in pé lo tablo d’in moun apré manz zaran la vyand mèg, lo zèf, lo zo é toute sak i ‘ansui. An pliss si ou néna bone dan, wi oi in pé koman wi kraze sa. Dèrnyé kou mon papa la di sa, sé kan nou lété par-la Mapérine dsi lo rotour, loto téi manz zaran pou vréman é lansien téi di : « Li san la kaze lé pa loin ». Oté ! Ala pa k’la rou i pète é lé blijé mète in parékla pou réparé. Sa la pa anpèsh anou ariv la kaz an bon éta mé konm i di, loto lontan sa té bandé sa. Alé ! Mi kite azot kiltiv zote nostalzi, si li donn pa frui, li done flèr kant mèm é ni rotrouv pli d’van. Sipétadyé..