Na poin lontan mwin la antande prézidan la chanb lagrikiltir apré parl do ri é li téi di. Sak i vé plante dori, i plante dori é par préféranss zot i produi lo ri konplé pars lo ri konplé i vande plu shèr épi la kliyantèl lé la pou ashté.

Astèr si ni rogarde in pé toute liv la diététik ni oi lo ri konplé sansa somi-konplé sa lé méyèr pou la santé. Mèm i produi pluss : inn tone paddy i done 750 kg ri konplé, é solman 600 kilo ri blan. Arzoute èk sa lo ri konplé néna ankor lo son dedan, néna son jèrm épi toute son vitamine. Normalman néna pliss travaye dann ri blan ké dann ri konplé sansa somi-konplé.

Mézami étan pti nou la manj dori rouj, épi dori konplé sansa somi-konplé é zordi si i done demoune do ri konmsa kissa k’i manzré ? Pars la fine pèrde labitide, pa sak wi sava rakonte azot sa lé méyèr pou la santé. Alor zot i oi labitide sa sé kékshoz lé inportan sa : kissoi labitide konsomé, kissoi labitide produir. Sète frui épi léguime par zour sa lé gayar sa ! Mé si wi manz pa ?

Madagaskar laba néna lo ri SRI é sa i done in bon randman : ziska kinz tone léktar. Kan wi lir koman i fé wi oi sa la pa si difissil ké sa pou in prodiksyon bonpé pli inportan. Mé oila la plipar bande plantèr la pa plante do ri konmsa é zot la kontinyé produi 2 tone dori léktar.

Mézami kan zot i fé rogaye mang, sansa rogaye zévi, zot i tir la po, zot i tir pa la po ? La plipar d’moune i tir la po, poitan dann la po néna sak lo frui i fé de méyèr. Donk volontèrman ni prive anou de kékshoz lé bon pou noute santé. Alala pou kossa i fo pa alé vite an sans kontrèr par rapor labitide demoune. Antouléka si i fo, lé myé alé dousman dousman.

A bon antandèr-salu.

Justin