Pli rézonab ké sa i pé pa. Révokissyonèr ? Sirman in révolissyon passifik dann lintéré noute pèp an rolassyon avèk bannzil l’osséan indien épi lé z’ot péi dann noute réjyon.

Dann mon modékri zoinal lindi, mi lanss in zapèl bann zotorité pou rann pli fassil in shéma konm mi sorte marke an-o la. Mi panss pèrsone an parmi sak i défann bann zintéré La Rényon i pé dir li lé pa dakor avèk sa. Pèrssone ? Mé oila lo problème. Mwin lé sirésèrtin bann forss viv lé pou sa, mé zot i anparl pa é konm zot i anparl pa bann zotorité i pran mèm pa la pène anparlé. Pandann tan-la kabri i manz salade.

Astèr si ni rogarde in kou par koté noute l’opinyon piblik, mi panss èl néna in gran rol pou zoué ladan. Sé èl k’i doi rante dann ron é si èl i rante dann ron mi oi pa pou kossa lé shoz i avanssra pa dsi la késtyonn noute dévlopman é anparmi la késtyonn lotonomi alimantèr. An-o la mwin té anparl in révolissyon passifik é sé sa ni doi déklanshé par in mouvùman d’fon noute lopinyon piblik.

Pars noute l’opinyon piblik lé pa inèrte kon i di dann la lang bann franssé. Dann d’ote késtyon konm la lang kréol, konm la kiltir, konm la késtyonn lojman épi d’ote é d’ote ankor nou la vi lo réziltan kan lopinyon piblike i rante dan la danss. Donk akoz pa pou in plan pou lo dévlopman é an parmi noute késtyon d’lotonomi alimantèr… Mé sé in sizé k’i domann son bann militan é bann militan i doi pa manké ali.

A bon antandèr salu !