Pou kossa, d’apré zot, mi panss sa ? Pou kossa mi panss lo péi i doi produi son manzé ? Pars mwin lé né dann tan la dézyèm guèr mondyal é pandan la guèr-la, noute popilassion la soufèr in bonpé d’apré sak nou téi antan noute papa, noute momon, granpèr-granmèr apré rakonté.

Dann sak zot téi rakonte l’avé touzour in zistoir d’tiké : tiké pou dori, tiké pou mayi, tiké pou la grèss, tiké pou savon, boudikonte tiké pou toute. Mé la pa pars ou l’avé tiké ké ou l’avé lo marshandiz é demoune téi déplass toultan pou rode lo marshandiz zot la bézoin é sak l’avé téi fé marshé noir. Alor zot i rande azot konte koman lo manzé lé inportan.

Aprésa, shak foi l’avé in pèryode de mank , so zistoir manzé téi ropran son linportanss égzazéré pou déssèrtin, normal pou d’ote é finalman sé pou sa ké noute zénérassion, épi sète la vni apré, é apré ankor, néna touzour lo soussi d’manzé. Mé sa lé pa vré solman pou nou rényoné, pars mi sipoz sa lé inportan in pé pou toulmoune dsi la tèr.

Alor sé pou sa, souvan défoi, mi parl lotonomi alimantèr é mi panss sa néna si tèlman l’inportanss ké sa i dovré ète d’apré mwin in rovandikassion pou la mazorité d’moune issi La Rényon é solon mwin sa i dovré kontinyé d’ète pou noute popilassion in gran sizé d’révandikassion.

A bon antandèr salu !