Mézami, mwin la lir dann Témoignages in lartik dsi lotonomi alimantèr é dann lartik-la lo moun la ékri i fé konm in prédikasyon pou lo plantaz dori issi La Rényon pars la baz nout manzé sé lo ri, é ni pé bien plante deri issi shé nou. Lartik lé dann zoinal mardi é si zot i vé zot i pé pran konésans. Zot i pé pran galman galman konésans in dossyé nou la fé dsi lotonomi alimantèr-mi pans zot pé aprann ladan dé shoz lé inpportan.

Mé antansyon bann léktèr nout zoinal, zot i porte antansyon dsi toute sak ni ékri é mèm dsi sak ni obliye ékri é kossa nou la obliye ladan ? Sinploman ké nout popilasyon i goumante mé la kantité d’ri ni fé vni pou manzé i diminyé. Donk ni manz d’ote shoz é sirtou issi la rényon, i manz dopin é si i manz dopin i fo galman plante lo blé é lo blé li ossi nou téi plante in bonpé par lo passé. Si n i rogard bien anpliss lo 44000 tone dori, ni fé vni ossi par-la trèz mil tone d’ot kalité séréal konm lo blé pou ansèrv konm farine pou fé dopin, gato épi d’ote shoz ankor san konté mayi pou fémanzé zanimo.

Kossa sa i vé dir ? Sa i vé dir néna in bonpé d’moun i manz dopin-sansa i manz inn é l’ote. Mi panss pa sa i vé dir nou lé apré shanj nout baz manzé mé sa lé a suiv é sirman ké lotonomi alimantèr i doi si ni vé ké li marsh bien baz dsi sak demoun i manz pou vréman. Mèrsi pou noute léktèr k’i porte vréman antansyon sak ni ékri. Solman vi ké nou l’apré diskité mi atir son latansyon noute dsi kékshoz : dsi la prodiksyion sorgho-ni apèl sa mayi pinm.

Bin figuir azot dann Burkina fasso, demoun i manz in bonpé d’pain, é zot i plante pa lo blé, mé zot i plante sorgho-i apèl sa gro mil é sa lé bien adapté bann klima sho. Donk gouvèrnman, dann lintéré son balanss komèrsyal, la ankouraz bann boulanzé pou mélanz sorgho avèk lo blé pou fé dopin… Romarke bien issi ossi i fabrik dopin avék la farine do blé, mé avèk d’ote séréal é pou kossa i fré pa avèk mapinm. An touléka néna toute in léspass i rouvèr dovan nou, in léspass bann possib.

Mé ni oi bien si konm gouvèrnman i vé lotonomi alimantèr durab, nou néna toute in rokonvèrsyon nout lagrikiltir pou fé. Donk i fo in plan séryé pou trap in lobzéktif sèryé, lotonomi alimantèr dirable.

NB Dann sid La franss olèrk kontinyé plante mayi pou zanimo, bann zélvèr opliss klima i réshof, opliss zot i komanss plante sorgho é parét’il sa lé bien intéréssan pou zot.