Noute toute i koné koman la mèr rouz lé tayé é koman lé possib — mèm fassil — koupe la navigassion dann in gran lang de mèr konmsa épizapré koupe noute laprovizyoneman, pars bien antandi sé dann l’érope ké ni sava shèrch laprovizyoneman pou toute noute nésséssité vital. Lé sirésèrtin demoune normal, avèk zot tète dossi zot zépol, i doi trouv in pé bizar ké ni sava fé nout laprovizyoneman loin laba dann l’érop an travèrssan bann zone souvan défoi lé pa sékirizé.

Ni vé, ni vé pa, dann fitir konm dann passé épi dann prézan tazantan nora linsékirité é nou nora problème si ni ni bouz pa plisské sa sof si ni trouv bann solission diféran d’sète zordi. Ni vé, ni vé pa, nou va trouv tazantan difikilté dsi noute shomin é lé possib ni trouv in gran pèryode la péniri konm sète nou la koni dann tan la dézyèm guèr mondyal.

Konm ni kontante pa nou d’rèss an plass, nou la di : akoz pa lotonomi alimantèr konm méyèr solission pou nou ? Nou néna la tèr pou sa, nou néna lé z’om konpétan pou fèr sa, noute popilassion lé do plizanpliss instruyé… avèk prèss diss mil bashélyé par an di pa mwin sé lé zintéllizanss k’i manke anou. Di pa mwin sé la volonté k’i manke nou.

Lotonomi alimantèr lé possib, é sé lo méyèr solission pou nou débrouye noute kari par nou mèm provi ké nou néna issi lo pouvoir pou fèr sa..

A bon antandèr, salu !

Justin