Samdi mwin la lir in lartik zoinal téi konsèrn zistoman lotosifizans alimantèr – otroman di lotonomi alimantèr mé inn é l’ote lé a popré parèye si ni tonb dakor dsi la définission. Alor, koman in pé défini sa ?

Mwin pèrsonèl mi oi sa konm la kapassité pou in péi produi a popré toute sak i fo pou nouri son popilassion épi fèr fass in mankman dsi lo plan mondyal.sa i pass an promyé par la prodiksyon sak ni pé apèl la baze noute lalimantassion.

Zord si ni rogarde sak ni prosui épi sak ni konsome, ni pé di nou lé pa otosifizan, mé sa i vé pa dir dann in domin ni ariv pa z ‘ète otosifizan pou noute manzé sansa gingn produi La Rényon ni produi pa dri an kantité, ni produi pa la farine, ni zognon, ni l’ail, ni luil, ni la vyande an kantié vouli, ni poisson alor ni pé dir nou lé pa sifizan an nouritire pou noute popilassion. Mé sa i vé pa dir nou lé andikapé dsi lo pwinnvizé-la.

Alor mézami mwin a di azot an-o la mwin la ire in lartik téi ropran lo kozman lo Prézidan la shanm la grikilrtir é téi di : « Lotosifizans alimant-èr la pa pou domin. » ; pou mon par mi di é rodi sinploman mon dë vérité sou la forme dë késtyon :

– Lotosifizans alimantèr lé possib ?, Oui li lé possib.

– Lotosifizans alimantèr lé nésséssèr ? Oui li lé nésséssèr.

Alor dann sé kondission pou kossa Prézidan la shanb i di lé pa pou domin ? Sinploman pars sa lé pa dann papyé la gouvèrnanss La Rényon é sé zistoman gouvèrnans-la ké bande zéléktèr La Rényon la di zot i vé pi.

I paré an o-lyé, i di konmsa késtyonn lotonomi alimantère nou néna pou troi moi. Kossa i ariva paré, si in bato i koul a pik dann kanal de Suèze, si dê péi malfourné i désside bonbarde si sinploman bande gran péi i komande la finanss i désside ashté toute la prodikssyon agrikol. Armète in pti kou d’éspékilassion la dsi… Apré troi moi, kossa k’i manze issi La Rényon ?

Mézami si mwin lété dépité osinonsa fitir dépité ala kékshoze mwin noré mète dann mon program, an bon plass épi mwin nora dévlope sa in pé partou dann mon sirkonskripsyon épi mwin nora pa larg ali issi li, Paris-li, dann zorèye gouvèrnman-li… Mi tienbo, mi larg pa é mwin lé sir si toute i done la min. Lotosifizans alimantèr sré pa pou domin ! Dakor.

Mé si néna inn volonté politik issi La Rényon, li pé z’ète pou apré domin… é lé touzour myé ké la sin glinglin.

Justin