Mézami, mi sorte lir dann nout zoinal néna in problèm de ri dovan nou pars La Thaïlande la désside domann son bann plantèr diminyé zot plantassion dori par raporte néna in manke delo. Parèye l’Inde la désside diminyé son zéssportassion dori sof bassmati pars manzé lé kourte pou son popilassion sirtou pou la késtyonn d’ri.

Alor la késtyon : kèl répèrkission pou bann ptite zil loséan indien sirtou sak i fourni ali an ri dann l’Inde épi dann La Thaïlande : I paré Moris i komanss santi in mank sirtou dann bann pti kartyé — sirtou dann la kanpagn — é pou la Rényon nou va anmank deri pétète pa sète ané, mé sa i pé arivé l’ané 2024. Bannzil Komor va ratrape azot dsi banane, épi dsi Manyok.

Nou ossi nou va sèye ratrap sa dsi fouyapin, manyok, épi d’ote ravaz sof ké nou lé tro orguéyé é si néna dori pou nou sirman nou va pèye sa pri for avèk d’ote prodiktèr pétète Madégaskar pars l’ané proshène banna i sava ésporté konm i di. Mwin la lir dann noute zoinal bann shinoi apré bien ède azot avèk lo ri hybride.

Mézami, mi koné in pé i voudré mète noute sor dan la min Madégaskar pou la nouritir mé pou mwin i fo pa fé sa. Alon lité pou lotosifizans pars sa nou lé kapab kansréti dsi lo 15000 éktar la tère abandoné. Ofissyèlman épi an maronaz mi pé assir azot ni pé fé sa, é si ni pé mi oi pa pou kossa in pé i rode anpèsh anou fé.
A bon antandèr, salu.

Justin