Oté

Lucet Langenier in éro popilèr lo pèp rényoné

Justin / 3 zwiyé 2020

JPEG - 43.6 ko

Matante Zélida la ékrir Justin :
Mon shèr nové, mon spèss salté, rouj-de-fon dovan l’étèrnité, Zot, bann rouj-de-fon zot i yèm bien sak zot i pans sé in bann éro pou lo pèp rényoné sirtou kan lé fine désédé. Mi koné in bonpé bann soidizan éro konmsa, dopi Paul Vergès, ziska Lucet Langénier an passan par d’ot ankor mi sava pa site lo bann nom. Poitan sak sé dé éro pou moin la pa banna mé tout bann résponsab la aplik la déparmantalizasyon isi La Rényon. Tok ! Pran sa pou toi !

Justin la fé pou répons :
Mon vyé matant k’i koz toultan la boush rouvèr out kozman i étone pa moin, ou k’i mélanz otour avèk alantour, ou k’i koz la plipar d’tan la boush rouvèr é ki pran po d’shanm pou pla kouvèr. Matant, vi koné in pèp la bézoin son bann éro épi bann zaksyon éklatant zot la amenn avèk bann ti kolon nout péi. Alon pa parl Paul Vergès pars nou nora mil okazyon pou anparl dé li. Alon parl Lucet Langenier, lo mèr la komine Sint-Sizane pandan trèzan. Sint-Sizane ké demoun i apèl dopi lontan « lo bo péï ». Mèm ké la télé la mète sètan pou pass in dokimantèr dsi Kounta kinté. I pé pa dir mésyé-la té pa in éro lo pèp rényoné, é sak li la fé, li mérite bien lo nom la poppilasyon la donn ali. Tok ! Pran sa pou ou !