Oté

Lulu, ni pé dir zordi ankor pliss ké yèr, noute fra ou l’avé si tèlman rézon !

Justin / 11 mars 2021

JPEG - 43.6 ko

Mézami, mi mazine d’ot ké mwin la fine poz azot la késtyon i vien dann mon tète dopi in bon boute tan. Ala èl la ! Mwin lé a d’mandé kèl konsékanss in kriz konm la maladi ni koné zordi i pé an avoir dsi lékonomi si la kriz i dire é si lékonomi lé frazil konm la n’ote. Pétète ni pé dir sa i pé donn in léfé négatif an shène : opliss lo lékonomi lé fèb, opliss la kriz lé riskab afébli ali ankor.

Issi La Rényon nou la poin in lékonomi prodiktiv dévlopé : nout séktèr primèr, l’agrikiltir, lé fèb, nout séktèr sogondèr, l’indistri, lé pa dévlopé ditou, é nout séktèr tertiaire sèl sèktèr dévlopé, l’apré pran lo shok. Avèk lo konfineman é toute sak i s’ansui lo komèrs, épi lo bann sèrviss, tousala i afébli. La pa bézwin éstatystik pou amontr sa, i sifi antann koman bann réstoratèr, bann lotèl, épi bann komèrsan an zénéral i koz, galman bann zantroprénèr kiltirel.

Donk ni pé dir, in lékonomi fèb, pa assé divèrsifyé, dominé par bann zinportasyon, san in marj liberté épi lotonomi sifizan, i afébli ankor pliss é si konm zordi la kriz i dire alé konète konbien kadav l’antropriz i sava ramassé apré lo gran shok… Touziss si la pa konm lo shien krazé dsi la route toute alantour bann shomin La Rényon.

Astèr kossa i fo ni panss bann gouvèrnman, bann prézidan sof Paul Vergès*, bann kapitalist la mète nout lékonomi dann in mové shomin konmsa ? Ni pé dir zot la bien konporte azot konm bann promotèr épi bann défansèr in l’ord dépassé - l’ord néokolonyal - é an mèm tan ni pé dir zot la foute anou dann in train ni koné pa kanssa nou va sort la-dan. Ni pé touzour dir, l’ord va vni apré sar pi ditou konm l’ord lété avan, mé si lé shoz i kontinyé konmsa ni pé dir-malorozman, l’ord d’apré va rossanm l’ord d’avan konm in goute dolo i rossanm in n’ote goute dolo.

Ni pé rogréte lo sistème politik ni viv dodan la pa lèss anou komand nout zafèr par nou mèm é l’èr-la ni pé panss lo késtyon nout kamarde Lulu téi poz toultan : « Kissa i komande nout péi ? » é ni pé dir, si lété nou, si lété lo pèp rényoné, nou noré sorte la kriz in zour pli for é pli kapab amenn nout péi dann shomin son vré dévlopman durab.

NB-Ni pé dir anpliss Paul Vergès néna ankor d’ote prézidan zot ossi zot téi vé dévlop La Rényon mé bann nouvo dirizan droite konm gosh l’avé pwin é la pwin, solon mwin, in vizyon d’in Rényon dévlopé é lé bien domaz la zape in zénérasyon dirizan politik. konfyanss bann nouvo i tard ar pa pou lévé.
* Kan mi di Lulu mi vé anparl Lucien Biedinger, in kamarade toute de moun téi koné.