L’avé inn foi pou inn bone foi, mésyé lo Foi la manz son foi avèk in grinn sèl. Zistoir-la i rakont koman Lyèv avèk torti la rant an konkirans pou oir kisa va maryé avèk la fiy lo Roi… Torti la di sé moin k’i maryé avèk la fiy lo roi. Torti la fé pou répons : i kol pa sa koko, sé moin k’i maryé avèk la fiy Lo Roi.

KrikéMésyé ! Kraké Madam ! Koton mayi i koul ! Rosh i flote !

Dann lo roiyome z’afèr té sèryé, kozman té I vol ba, kasaz ti boi, kasaz lé kui. In pé l’avé ziska pèr la guèr I pète rantre zot. Inn I di : « Mi pans sé lyèv va gagné ! ». D’ot I di : « Sé torti va gagné moin lé pliské sir ! ». In pé I zoué larzan dsi l’afèr : mète sink, tir sis, sa I aprann pa dann katéshis !

Torti i zoué la provoke. Ala ké li di la Fiy Lo roi : maryé èk lyèv sé maryé avèk mon shoval pars lyèv I sèrv amoin shoval. Nitil dir azot lo brui la sème partou, zorèy an zorèy, boush an boush, toulmoun la fini par antann sète afèr-la épi bien antandi la tonm dann zorèye lyèv. Lyèv té bandé an trannsis é li la ziré : i fo mi amen torti dovan la fiy lo Roi pou li dédi son mansonz.

Kriké mésyé ! Kraké madam ! La taye dann mon sak ! La klé dann out posh !

Ala lyèv la poz la min dsi torti épi li a di : ti vé, ti vé pa t’alé dovan la fiy lo. Torti la di, i mank amoin kostime ! Lyèv la réponn : m’a done aou kostime mé ou v’alé dovan la fiy lo roi. Torti la mète son kostar. Torti la di, ousa i lé mon bote an kuir. Lyèv la di : moin va done aou in pèr bote mé ou v’alé dovan la fiy lo roi. Torti la gingn in bote épi li la mète. Mé li la di ankor : okilé mon shapo koboye, Lyèv la réponn : m’a done aou shapo koboye mé ou v’alé dovan la fiy lo roi. Ala torti avèk son shapo koboye. Mé torti la di : okilé mon pèr z’afèr an métal i sèrv pou mont shoval. Lyèv la trouv sa pou li, sak i apèl z’épron. Astèr Torti la di : « avèk tout sak ou la mète dsi moin, mi gingn pi marshé, i fo ou i port amoin ». Lyèv la di : m’a port atoué si i fo mé t’alé dovan la fiy lo roi. Oila in drol l’ékipaz : in torti monté a shoval dsi in lyèv !

Kriké mésyé ! Kraké madam ! La taye dan out sak ! La klé dann mon posh !

Ala lo drol d’ékipaz i ariv dovan palé lo roi. Lyèv dosou, torti dosi. Parl pi la kantité zanimo té la é pou anshévé torti la fou dé pti kou d’zépron é lyèv la mète o tro épi o galo. Final de kont torti la gingn son paryaz é li la maryé avèk la fiy lo roi. Lyèv la parti maron. In pé i di mèm li lé mor avèk la ont.

L’avé in foi, mésyé lo foi, la manz son foi èk in grinnsèl. Koton mayi i koul, rosh i flote.