Shoval la fé lo fyèr, mé li la pa nyabou vèye lo basinn lo, pou bann zanimo an avoir lo prop atitré. Lo roi lé blijé konstat shoval la éshoué. L’èrla li désid : « Bèf va gardienn lo asoir ! »
L’avé inn foi, pou inn bone foi, mésyé lo foi, la manz son foi èk in grinnsèl.

Bèf lé kontan. Li fé lo fyèr. Li parade. Li di, dann son kèr : va oir sak va oir élo bann asosyal va konprann kèl koté brinjèl i sharj... Konm lo soir i tonm, konm solèye l’apré lav son pyé, Bèf i vien koté basin. Li égzamine lo lo basin, agosh, a droit, dirélksyon solèye, diréksyon lo kap. Apré li fé lo réfléksyon : sak i sa sali dolo, i fodra li kont avèk mon korn poiti. In kou mèm é mi anvoye ali dann niyaz… Momandoné, lyèv i ariv an siflan, in boutèye do myèl dsou son gingin. Bèf, dopi landroi il lé, i toiz lyèv !
« A ! Lyèv ? Mi pansé ou lété dann l’égzil ! »
Lyèv i fé pou répons : « in pé i di sa ! Mé la pa tout sak i di sé la vérité ! Ou i oi bien moin lé la, é anplis avèk in gran boutèye do myèl dsou mon bra.I diré aou sa ? ». Bèf i di oui, mé lyèv i ddi ali : « Moin lé dakor pou partazé, mési ou i fout amoin in gran kou d’korn, i anvoye amoin valding dann niyaz, dann kèl léta moin sar randu. ? »
Aprésa, lyèv i di bèf lèss ali anmar son kate pate ansanm épi son tèt galman avèk mèm kord. Aprésa li promète li va donne bèf do myèl. Bèf i aksèp ! Mékan li la fine aksépté, lyèv i anmar ali solid mèm épi i manj son myèl sou lo né bèf. L’èrla Bèf i konprann kosa l’ariv shoval. Li konprann galman li la tonm dann pyèz lo lyèv.
Apréa, sou son zyé, lyèv i sali lo lo dann basin, i fé kaka dann lo épi tout son bézoin alor. Bèf lé ékéré ! So lyèv-la, sa sé in vré salopyo sa. Mé tro tar. Gran matin bann zanimo i romark z’ot lo lé sal épi i pi lo dyab. Zot i sava kongn dsi la port lo roi pou dir sak la fine arivé. Lo Roi la fine romarké sak l’arivé par l’fète la rène la fine dispite apré li.
Kriké mésyé ! Kraké Madam ! La klé dann mon posh, la taye dann out sak !

Lo roi i désid so kou isi sé tortu va avèye basinn lo. Bann zanimo lé dégouté. An aoir in roi po li désid in n’afèr konmsa. Torti ? Kosa sa i gingn fé ? Kisa li lé kapab arété li ? Sé fout z’ot tète in n’afèr konmsa.
Torti son koté i dégonf pa. Dann son kèr li di li va trap lo salté la fé in n’afèr konmsa. Li prann inndé dalon, li amenn avèk li. Li fé fonn la kol fort épi banna i pènn son kok. Kan la fini, li di son dalon amenn ali dann lo. La, li bouz pi, li aspèr, li aspèr, li aspèr. Lo monstré la fé sa, son poi lé o fé. Solèy apré lav son pyé ! La nuit i ariv san tardé. Lyèv i ariv. Li l’apré manj in gran morso kann mapou. Li gard kisa i avèy basinn lo, pèrsone ! Bann zanimo la fini par ronons défann z’ot basin. Lyèv i mazine déza tout déga li sa fé dann basin d’lo. Pétète mèm li nora lo tan boush lo l’arivé d’lo, kass lo basin épi konm poin d’org fane son kaka avèk son pisa d’dan. Mé avansa, li oi in nouvo bèl galé. Noir épi briyan vèye pa koman. Li pran son l’élan. Li sava pik in tète dann lo.
Zistoir la pankor fini-vantredi proshin sizyème morso v’arivé.