Oté

Lyèv avèk tortu-koman lyèv la shap avè k la prizon-uityèm morso

Justin / 5 out 2018

JPEG - 43.6 ko

Mé zami, zot i koné lyèv sé in zanimo monstré. Mi koné pa si lé par zalouzi. Mi koné pa si li la bézoin pou vréman, vanjé kont bann zanimo la fé ali in n’afèr sèryé. Sak mi koné, li la si tèlman fé lo kouyon, k’la fini oar mète ai dann in kasho é ni pé mèm dir : « Ala li lé o ban bann zanimo, par raport tout son mové kou ». Shoval la tonm dakor avèk lo Roi pou vèye lyèv an atandan i pass prosé lo lyèv.
L’avé inn foi, pou inn bone foi, mésyé lo foi, la manz son foi èk in grinn sèl.

Shoval i vèy lièv anfèrmé dann kasho. Mé lyèv l’apré, konm i di, mète shoval dann son posh par la maji la mizik. Lyèv la fé son vyolon é avèk son vyolon li l’apré fé in niméro la sédiksyon avèk shoval. Li zoué tout sort shanté lontan, sak lo mélodi lé kalou pou vréman. Momandoné shoval i komans tonbé konm kan ou i fé dor in pti marmaye. Shoval l’apré kaziman tonm somèy mé sa i ansèrv pa lyèv gran shoz vi ké li é také dann son kasho. Lyèv i fé travaye son koko pou li rode in moiyin roul shoval dann la farine.
Kriké ! Kraké ! Kriké mésyé ! Kraké madam ! Koton mayi i koul, rosh i flote !

Lyèv I arête zoué son violon boite sardine. Sa i fé lèv shoval. Shoval i domann : pou kosa ou l’arète zoué ? Kosa k’i plé aou dann out manyèr roul de moun dann la farine.arète aou si ou i vé, pars domin ou va oir kosa sé kosasa !. ; Lyèv i fé pou répons :
« Shoval mon zami, mon dalon, mon kamarad. Si moin l’arète zoué mon vyolon sé pou raport ké, konm la port l fèrmé, ou i vien pa bou bien antann lo son mon mizik. Si ou i vé pous solman in pé la port é moin mi promète aou mi zoué pa ou in tour d’koshon. Moin lé rézonab ! Moin la fine rogrète sak moin la fé ! Fé kon m mi di aou : rouv in pti pé la port épi ou va antann mon mizik done lo grin.
Shoval la pèr é li krin an mèm tan. Li di dann son kèr : mi pans lyèv l’apré roul amoin , mé pé sfèr vréman, lo tan pou li fé son bann tour d’malis la fini.. Boudikont shoval i détak in pé la porte. Lyèv i anbrèye avèk son mizik é momandoné in bèrsèz la rézon somèye shoval. Li ronf, li dor poin fèrmé.
Lyèv i lèv dousman. Li pous la port avèk lo pyé ala li loumaye. Parti ! Tro tar kan shoval i konpran sak l’arivé.
Kriké ! Kraké ! Kriké mésyé ! Kraké madam ! Koton mayi I koul, rosh I flote !

Lyèv la nyabou shapé. Shoval I sava gingn son dé mo par la boush lo roi ars li la défayi dann son misyon é sa sé in kékshoz lo bann roi , konm lo bann shèf iyèmpa ditou. Zistoir la pankor fi ni é zot va touv la suite dan n zournal somen n proshène lo samdi.
Zoinal la pankor fini, samdi k’i vien lo névyèm bout.