Oté

Lyèv avèk tortu - lyèv i shap la prizon - sétyèm morso

Justin / 28 zwiyé 2018

JPEG - 43.6 ko

Lo roi, konm zot i ansouvien la désid mète lyèv dann la prizon pars li la parti sali d’lo bann zanimo i ansèrv - an atandan fé pass son prosé. Shoval i di li va gardien lyèv dann son kasho la prizon é lo roi i done ali son konfyans. Oir si lo konfyans lé mérité ! Sé sak ni sava oir zordi dann sétyèm morso.
L’avé inn foi pou inn bone foi, mésyé lo foi, la vann son foi pou in grinn sèl.

Dann roiyome zanimo l’avé poin bonpé kasho. Arienk inn mèm avèk dé pyès in pé faye mé asé solid pou fèrm in lyèv. Lyèv lé koushé in koté dann son sélil é shoval, dann lo pyès de gard, i vèye ali konm dolé dsi l’fé. Mèm ké lyèv lé koushé, si ou i koné ali in pé, ou i san néna kékshoz l’apré shofé dsou son dé zorèye, dann son koko d’tète. San trayir pèrsone, ni pé dir lyèv i pans in sèl z’afèr, sé koman shapé ; koman sort de la. Lyèv la pa in zanimo pou rès anfèrmé sa… Si lété posib pass ali in kou d’éskanèr, noré vi la kourb brizé son bann pansé. Koman mi sa shap èk sa ? Koman mi sa shap èk sa ? Mi sava pa pass in vi dann kasho kant mèm, arienk in nish moin la fé so bann gogo zanimo épi m’a rèss dann la prizon in bon parti mon vi. Lé pa posib in n’afèr konmsa !
Kriké Mésyé ! Kraké Madam ! La klé dann mon posh ! La taye dann ton sak !

Nou la kite lyèv li té apré majiné. Li té apré majine in plan pou li sové ! Lyèv mi rapèl azot sa in l’éspès robèl sa ! Sa i aksèp pa la vi dann in prizon ; li la pa konm son kouzin lapin demoun i mète dann park pou fé pti épi bann ti i grosi la mèm dann kaj. Lyèv néna in l’éspri indépandans é astèr mi ansouvien li yèm zoué la mizik. Zistoman li l’apré koz èk shoval.
« Shoval ! shoval ! Ou i pouré rode dé troi zafèr pou moin. Pou moin fé in violon. La myène lé monkaz é lo roi i lès sar pa mon madam amenn sa isi »
Shoval i gard ali gro zyé mé li di kant mèm : I fo amoin in boite sardine konm kès rézonans, in boi é in kord pou fé lo l’arshé, in ot boi pou port lo bann kord. L’am, inkyète pa m’a débrouye par moin mèm épi fil métal. Avèk sa mi gingn fé mon violon. Shoval i di pa arien, mé lyèv i insis, insis , insis mèm. Shoval i vien kiryé : promyé foi li antann in n’afèr konmsa é li èmré bien antann la mizik lyèv i zoué… Li sov in néstan épi li ramenn sak lièv la domandé.
Lyèv in bon brikolèr é son violon lé fé. I pran pa bonpé l’tan pou sa. Astèr li fé son l’arshé épi li règ son mizik : do, ré, mi, fa, sol, la, si do. Do, mi, sol, do, sol, mi do. Arienk lo bann game i fé plézir shoval. Jij pi kan lo zouar i zoué ti-flèr émé, in shanson Fourcade avèk fossy, shoval i mor d’plézir é li pé pa anpèsh ali férm lo zyé..
L’èrla, lyèv i di avèk shoval : « Shoval ou i yèm bien mon mizik, ou lé for pou aprésyé in mizik konmsa. Kost in pé koté la port moin néna dé parol pou dir aou. Avans solman out zorèy koté la port ! »Shoval i avans son tète koté la port.L’èrla lyèv i di avèk li : « Kèl mizik ou i vé antann ? Moin lé paré pou zoué pou ou ! »
Shoval i di inn dé morso konmsa konm Marinella é lyèv i zoué pou li. L’ot gogo lé kontan vèye pa koman. Li fèrm lo zyé pou myé ékouté, pou myé antann. Lyèv in jouar bandé sa, é sak l’amontr ali la mizik la pa pèrd son tan, é la pa vol son famiy.
Kriké Mésyé ! Kraké madam ! Koton mayi i koul ! Rosh I flote !

Sétyèm morso lé fini, mé lo zistoir la pa fini. Samdi proshin uityèm morso.