Oté

Lyèv avèk Tortu - so kou isi tortu gardienn lo-sizyèm morso

Justin / 21 zwiyé 2018

JPEG - 43.6 ko

Shoval laté volontèr pou gardienn lo, mé li la pa gingn amenn son misyon ziska lo bout : arète lo koupab i sali dolo dann basin. Bèf la sèye son tour mé li galman li la pa gingn trap son bi. An dézèspoir lo roi i domann tortu gardien lo basinn lo. Tortu i di oui. Li sava koté lo basin, li fé pass la kol fort dsi son karapas épi li rant dann lo. Li bouz pi ! Lyèv i ariv avèk in gran morso kann mapou é li rogard lé z’alan é lé pasan. Pèrsone ! Poin pèrsone ditou. Lo basin lé a li !
L’avé inn foi, mésyé lo foi, la manz son foi èk in grinnsèl.

Kosa lyèv i oi ? Kosa, In bèl alé dann basinn-lo é anplis in bèl galé luizan vèye pa koman. Lyèv i pran la pant lisote in kou, pou alé pik in tète dann lo. Lyèv i fé involtaz baya, li poz son dé pate déyèr dsi la kok tortu.
Bondyé ségnèr, kosa k’i ariv, Lyèv i arès kolé dsi la kok tortu. Avèk la raz li flank in kou d’son pate dovan : son pate i arès kolé. Li flank in kou d’déyèr : son déyèr i rès kolé. Li flank in kou d’tète ; son tète i arèss kolé. Li sèye bouz-bouz ankor in pé mé initil. Konm shanté mardi gra téi di : sote koman ti vé koko, toué lé pri dan la min korbo !
Lyèv lé pri, tortu i sort kokolok-kolok dann basin é lu mète an rout pou alé rann kont o roi. Mé bann zanimo i komans konète. Zot i form la è. Zot i kriye apré lyèv, zot i bate la min pou tortui. Lé près konm kan i fé in kours vélo. Tortu i marsh mèm avèk lo lyèv bloké dsi si son kok.
Kriké Mésyé ! Kraké madam ! La klé dann mon posh , la taye dann out sak !

Lo roi bann zanimo lé kontan vèye pa. Li félisite Tortu ! Li réprimann lyèv. Tout bann zanimo i kriye : « Fou sa la zol ! fou sa la zol ! », « tyé sa don ! Tyé sa don ! ». Lyèv i bouz pi mé dann son fonnkèr li pans : « Si mi sort la zot va konète mon poi. Néna in zour i apèl domin ! » ;
Lo roi i donn lé zord pou k’i mète lyèv o kasho. Aprésa li domann : « Kisa i gardien lo prizonyé ? ». Shoval lé volontèr, bèf lé volontèr ! Tortu l é volontèr ! Lo roi i di :
« Shoval ou va gardien lo prizonyé ! »
Shoval lé dakor pou gardien lo prizonyé. D’apré sak i di. Li di :
« Mon roi, vi k’ou i done amoin out konfyans, sé moin va vèye lo prizonyé. »
« Kriké ! Kraké ! Koton mayi i koul ! Rosh i flote ! »

La pankor fini-somenn proshènn sétyèm morso