Oté

« Lyèv i koné son zèrb ! »

In kozman pou la rout

Justin / 18 zwiyé 2019

JPEG - 43.6 ko

Mésyé, Médam, la sosyété, moin lé sir é sèrtin zot i koné kozman-la. Pou kosa ? Pars zot i lir nout zoinal Témoignages dopi in bon koup de tan é la pa arienk zordi ni donn son plas i mérite ali, la kiltir popilèr nout péi : kisoi zistoir, kont, lézann, kosa in shoz, maloya épi tout mizik. Lé vré nou na poin bonpé moiyin, mé ni sèye fèr sak ni gingn… A ! Si tout téi fé konmsa, noré té pli fasil pou nout kiltir mark son poin konm k’i fo. Astèr kan ni di sak nou la mark an-o la ni vé parl sans prop : lyèv i koné forséman lo zèrb i ansèrv ali konm nouritir osinonsa konm médikaman ; épizapré lo sans figiré donk son l’aplikasyon dann la sosyété, dann bann rolasyon lé z’inn avèk lé z’ot. Koman i aplik sa ? Sinploman kan in moun i koné ziska ousa li pé alé avèk in n’ot : kisoi in mari, in madam, in zanfan, in patron, in salaryé. Désèrtin i diré, la pèrsone i koné ziska ousa i fo alé, san alé tro loin. Alé ! Mi kite azot rofléshi la dsi é ni artrouv pli d’van. Sipétadyé !