Dann la lang fransèz na in patoi i anparl mémoir lyèv, pou dir lyèv na poinn mémoir é pou dir galman si in moun nana in mémoir lyèv, sa i vé dir li rotien pa gran shoz… An parlann lyèv, mi souvien de moun téi poz z’ot pyèz près koté l’androi zot la fine trap in lyèv é d’apré sak mi rapèl inn dé zour apré lo moun téi trap ankor in n’ot… Antansyon ! I fo pa pans bann z’animo na poin la mémoir : tout sak i sèye anpoizone lo ra, i koné bien sa i éspas pa konmsa. Momandoné lo ra la fine débisk tout bann téknik demoun, é a partir d’la, pi késtyonn trap azot. I di osi in mémoir zéléfan é sa sé in bébète i obliy pa ou... Biensir nout kozman sé in provèrb é ki di provèrb di galman in vérité pou l’moun é sé lo moun souvan défoi nana la mémoir lyèv. Alé ! Mo lèss azot réfléshi la dsi é ni atrtrouv pli d’van sipétadyé.