Mézami zot i an souvien, dèrn yé foi nou la vi koman Tortu la souk lyèv avèk la kol forte barbouyé dsi son kok. Aprésa l’amenn ali dovan lo Roi é sète-la lété pa kontan pou dë rézon : inn pars shoval avèk Bèf la manti avèk li kan zot la di in réjiman monstré l’atak azot alé oir té sinploman lyèv.

Dézyèm rézon pars Lo roi té malkontan oir lyèv, lo robèl, dovan li. Donk li la désside donn l’ord bèf ppou gardien Lyèv dann la prizon ziskatan i pass sonprossé. Mé prossé-la la pa sir sa i ariv in zour si tèlman Lyèv lé pliské malin.

L’avé inn foi pou inn bone foi, méssyé lo foi, la manz son foi èk in grin d’sèl !

Ala lo soir i ariv é lyèv lé dann la prizon. Bèf ossi mé pa si tèman dann la prizon dann in konpartiman séparé par in griyaz avèk la sèlil lo prizonyé. Lyèv i angaj la konvèrssassion avèk bèf. Oté bèf ! Li di. Mi yèmré konète si wi yèm la mizik pars mwwin avèk in arien ditou mi vé in gayar mizik. Si wi aksèp doneamwinin kalimé papâye, in pé la fisèl épi in kord nilo, sir ké mi sa zoué la mizik pou ou.

Bèf i di : « Lyèv, mi koné aou tro, mi oi bien sa in fasson pou zoué amwin in mové tour. ».
Lyèv i fé pou répons : « Bèf akoz ou lé méfyan konmsa ? Domin sar mon prossé é pétète la zistis makro va kondane amwin a mor. Donk lé normal, so soir mi zoué in kou d’mizik, pou ou, é pou mwin, pou kontante inn é l’ote ! »

Bèf i sède é li sava rode lo bande koméraz lyèv la domand ali é in néstan lyèv la fine fé in linstriman i sone kaziman konm in violon. Lyèv i mète a zoué, bèf lé kontan d’sa vèye pa koman.
Lyèv i poz késtyon, li di konmsa : « Bèf wi yème bien mon mizik, wi yème bien régué ou ? ». Bèf i aprouv é lo robèl i zoué bande mizik plizanpli zoli, plizanpli intéréssan.
Bèf lé o paradi é li lé kontan avèk lyèv. Kontan mèm !

Mé o fète, kèl sé lo plan lyèv l’apré maté li la ? Zot i panss in madré konmsa i kalkil arienk fé plézir bèf avèk zoli mizik,. Mi krin for é proshène foi nou va oir.

Sizyèm morso la fini pou zordi, samdi proshin nou va oir la suite.
Koto mayi i koul, rosh i flote.

Justin