Mézami zot i rapèl tortu la trape lyèv avèk la kol forte dsu son kok pars lyèv té apré annuir la kominoté zanimo arienk an salissan dolo. Aprésa la souk ali, la mète ali dann kasho an atandan d’fé pass son prossé. Mé lyèv néna limazinassion é lo gardien — lo gro bèf — gro misk pti sèrvo ; donk li la fé in linstruman i arsanb in vyolon é sé d’mète a zoué. Bèf i trouv sa lé gadyanb é li vé ankor antande lo prizonyé zoué.

L’avé inn foi pou inn bone foi, méssyé lo foi, la manz son foi èk in grin d’sèl.

Momandoné Lyèv i arète zoué é li di avèk bèf :
« Mon mizik i plé aou ? Mé wi koné pa kossa wi pèrde avèk so porte fèrmé rantre nou. Rouv solman in pti pé é ou va oir. ». Bèf i vé pa ékoute lo zouar d’mizik, li domande solman ké la mizik i kontinyé, ké la mizik i arète pa, pars sa iplonz ali dann in douss ivrèss. Mé son sèrvo i mouline, i mouline épi momandoné li détak in pé la sérir épi li rouv lézèrman lo porte. Lyèv la konpri ali, é toudinkou li zoué in bèrsèze. Li zoué dodo la minète é zyé bèf i komanss fèrmé ; i tarde pa li komanss ronflé. Lo zouar i zoué mèm é opliss li zoué, opliss bèf i anfonss dann somèye.

Kriké ! kraké ! Kriké Méssyé ! Kraké madam !

Lyèv i lèv épi li zoué son violon épi dousman dousman li sorte kasho, li pran in pé la distans. Aprésa li poz son mizik épi li vien landroi néna lo liv prizonyé épi li ékri : « Lyèv la parti an kroizade pou libèr la tèr sinte. » épi loumaye ki di.li lé parti.

Mézami mon zistoir lé fini, mi éspèr sa la intérèss azot. Astèr alé zot mèm, alé rakonte zistoir-la pars lé bon toute bande zanfan i koné sa.

Koton mayi i koul, rosh i flote. L’avé inn foi pou inn bone foi méssyé lo foi la manz son foi avèk in grin d’sèl. Astèr li kriye avèk lo van : « Rande amwin mon foi ! Rande amwin mon foi. »

La Fini.

Justin