Oté

« M’amontr aou koué ksé k’kosasa ! »

In kozman pou la rout

Justin / 16 séptanm 2020

JPEG - 43.6 ko

Mézami, mi koné pa si zot i koné kozman-la. Dann tan téi apèl sa in patoi é patoi-la téi fé son shomin dann tout La Rényon é shakinn téi mète dodan sak li téi vé. A ! Biensir, sa la pa in konpliman, sa sré plito in ménas, la promèss in bon rèss trankil. Dann in sosyété komandé tazantan par la fors brital néna in bonpé kozman i tourn an jé d’pongn konmsa. I di pa : m’amontr aou kèl koté brinjèl i sharj, sansa ankor sète-la : « M’amontr aou mon kèskésé. »-in dèrnyé pou la rout : »m’a bate out mayi san tir koton. ».. Anfin, néna in bonpé kozman-patoi si zot i vé - i anparl de sa. Pou kosa in zour sa lé éné, sa la parti partou, toulmoun téi di patoi-la é pétète in zour li disparète san rézon, konm li l’éné. Alé ! Mi lèss azot majine in pé tout bann patoi nou la antann épi nou la ansèrv dépi nou néna nout konésans ziska nou la travèrs la vi par-an-par. Alé ! Ni artrouv pli d’van. Sipétadyé.