Moin la konu son non kan lu la été minis lédukasyon nasyonal la Frans na in pé tan dsa.
Dayèr, kan li lété minis, konm li lé plito bien portan, na in moman, bann sindika zanségnan mi kroi la di : « i fo dégrésé le mamouth ». Té po dir dan ladministrasyon nana trod fonksionèr ; i fo siprim in pé… le mamouth sé in léspès éléfan gran poil la fine disparèt la sirfas la Tèr.

Allegre lé in gran géo-chimist, in siantifik, in vré, i fé la rosers.
Son liv li la ékri an 1990 : po protèz nout planèt !
Lé pa sinp.
Na lontan mi koné Allegre lé in pé kritik si sak li antan a propo « sanzman klimatik ».
Li di minm bann mouvman ékolozis la pa aprofondi zot réfléksyon ; sifi pa sort slogan ; dé foi i deviin inn mod ! Pars an Amérik laba na in savan la sort sa…ti pran sa konm parol lévangil ?
I fo biin analizé ; rogard biin kondisyon ban zékspèrians !

Lozone sé 3 zatom oksizèn atasé ansanm (O3) ; sé in gaz dan latmosfèr, lér i antour nout planèt ; mé nana plis, an konsantrasyon, odsi pol nor ék pol sid, 35 kilomèt si nout tèt ; lozone i arèt réyon iltraviolé anvoyé par lo soley ; or, zot i koné réyon-la i bril la po, i donn kansèr…
Fo pa détrui so kous dozone, li protèz a nou.
Zot i koné koué i kas la kous dozone ? Bann gaz tuyo lésapman nout bann loto, la polisyon, bann fimé lizine… kan ti fé linsinératèr, tout fimé i mont na kalité gaz laddan i ariv ziska lozone, i kas son molékil ; minm bril tro do boi, plastik, kaoutsou, na pétèt molékil simik laddan la pa bon ! …
Po moin konprann sé koué la kouch dozone, ma lir tout lo liv, ziska la fin ; ma roparl a zot sa, sé in istwar a suiv !

Justin