Lér moin ta po rogard si la mèr Ter Sint in léspès lantouraz, o moin 50 mèt diamèt ; moin té ék mon garson ; mi di a li i rosanm in pièz poison ; tout bann plo rouz i flot ; zot i koné konm ti balon li désine in ron ; konm mi wa in pésèr soumarin ék son palm, mask, tuba i tourn otour ; mi rod dan mon tèt koué ki spas ; si lo nazèr ék son lékipman soumarine li laprè fé rant poison dan lo gran filé, i fo mi trouv in lantré !La poin lantré ; mi ardi mon garson : « ti wa in pièz poison konm sa, lo filé i dsann zisko fon, pétèt 2-3 mèt ; nou lé dan lantré lo por Sinpièr, li lé pa tro profon ; filé la na ti plon i fé plonz a li zisko fon, li tous lo sab, poison lé prizonié ; li sap pi.

In moman doné, lo nazèr ék son tuba i sort dann lo ; i sa va pli loin si la plaz galé ; li na rien a voir ék filé la, li la po rafrési a li dan la mèr, i fé so, li naz inn ti pé po lo plézir !
Bin sé koué lo gran filé ék son pièz i plonz dan la mèr ?
Sét alor kin vié bononm lo kartié i viin asiz koté moin ; nou koz.
Sé koué so filé ? Mi pans sé in pièz mé mi wa pa ditou ou i fé rant lo poison !

Konm koté nou na in GIE (Groupman Intéré Ekonomik) i vann tout poison zot bann dalon i sar pés o larz-lo ton,lo dorad, léspadon, ti zone, ti rouz, milé, karang-lo vié boug sé déksplik a moin : « dan so gran pièz tiwa, bann boug la i mèt zot pés-kaval ; laddan nana bonpé, bonpé pès-kaval vivan ; zot i tourn dan la mèr, konm dan in prizon, mé zot i respir bien, zot i réss fré ; konm sa kan klian i domann, tanza ot, bann vandèr la i rant dan lo filé ék in panié, in lépès vouv si ti vé, in sak persé, é la, ki soi 10 kilo, ki soi 20 kilo, iserv domoun zot pès-kaval !!!
Pa bèt lo sistèm…
Ma mèt mon pès-kaval dan in park po zot rés fré !!!

Justin