Oté

Madam la ministrèss : préfé la, sa la pa in moun de konfyans sa ! Sa i pran kréol pou zouèr kart !

Justin / 27 novanm 2018

JPEG - 43.6 ko

Zot i koné demoun i défons la port ouvèrte ? I paré la poin arien lé pli fasil ké sa, mé sé in n’afèr i pé zète in pé danzéré kant mèm. Pou kosa mi di sa ? Pars dopi dé zour néna in sèrtin madam Girardin, ministrèss dé son éta, l’apré di é rodi dann zoinal épi dann télé mèm é sa sé konm k’i diré son bote sokrète el la dmann lo préfé pou fé bèss lo pri lésans .

Zot va dir amoin èl lé for. Koman èl la fé pou trouv in n’afèr konmsa-kaziman la poud a kanon, sansa lo fil a plon. Koman in n’afèr zényal konmsa la vni dann son tète, èl ké néna dé shoz é dé shoz pou èl okipé… Romark son bann konséyèr sir plas la du souf aèl sa dann son trou d’zorèye : la di aèl konmsa bann rényoné i yèm pliské tout z’ot loto é konm pou fé roul in loto i fo karbiran, bann koséyèr la du dir aèl i fo atak lo problèm koté nout portfèy i plèr.

Koméla i paré sé lésans-kant mi di lésans armète ansanm gazoil, lo gaz. Donk bann produi pétrolyé an zénéral. Mi pans mèm son bann konséyèr la du dir aèl : « si ou i donn l’ord lo préfé pou bèss lo pri lésans, olèrk bonbard aou kou d’zèf pouri, lé kapab port aou an triyonf… Konm la port Erika laba dann péi Guyane ». Porté an trionf, baraz, an baraz, par bann gabyé kosto, néna dé koi satouye out doi d’pyé. Mèm Macron lé riskab d’ète zalou.

Mé oila, pèrsone la pa di aèl vi la konzonktir, vi lo parité éro-dolar, lo pri bann produi pétrolyé i doi béssé moi d’désanm. Alor la son rézolisyon, son promèss, son l’ord pou doné, i pran lo fon, i fé plouf kaziman. Ou i san pa d’isi in lodèr zèf pouri apré lové, Ou i san pa lo shok in zèf kasé dsi out koko d’ tète ? Mon dyé madam Girardin, kèl idé dan ou pou anons in kékshoz konm sa… Ma dir aou franshman : « Sa sé in konplo lo préfé ! Vénan d’li sé in gob asiréman ! Sé li k’la trouv in n’afèr konmsa ». Moin la fine dir aou i fo pa fé konfyans in ga konmsa : li pran kréol pou zouèr kart. Li pran aou pou in poupète bok. Fransh vérité !