Mwin té i krwa, konm bonpé d’Rényoné, ké lo métod politik d’zané 60 , té déryèr nou, ébin mwin la tonm d’si l’ki, lot dimansh, kan mwin la vi dann télé zimaz la méss légliz Sodron.

Nou lé an kanpagn pou zéléksyon éropéinn. Nou vot lo 26 Mé proshin. Nou lé an démokrasi, parétil, lé donk lozik tout kandida i fé zot propagand , i dévlop zot program pou rékol lo pli posib biltin , lo zour lo vot. Mé arèt siouplé, pran nou pou kouyon !

Lot sominn donk, dé kandida éropéinn Parti governman Makron, Nathalie Loiseau, tèt de lis ék Stéphane Bijoux, la débark la Rényon pou fé la shas ék la pésh lo woua. Ziska-la, na pwin d’problém. Sof ké, kosa kréol la aprann, kosa kréol la vi ? Lo dé zapot Makron, promyé ran, la méss ramo légliz Shodron, dimansh matin. Toulédé, i pouvé pa mank sa, akoz askiparé zot i ador bondyé la Rényon, sirtou lo Sintéspri légliz Shodron. Si télman la télé la kour karté pou film azot. Konm dann tan Michel Debré !

Binwi, mézami. Bann zén zordi i koné pa pétèt, mé dann zané swasant, sak kou Michel Debré, té débark la Rényon, pou son kanpagn éléktoral, li té sar la méss légliz lo dimansh, défwa Sinn-Dni, sinon Sintandré, sansa ankor dann Sirk Salazi. Promyé ban lo néf, té rézérvé pou li ék son lékip frodèr zéléksyon. Néna désertin d’zandrwa, li té profit lo sorti légliz, pou fé son préshman, pou vomi son kolèr d’si Kominis. L’ORTF té rat pasa pou aryin ditou, pou armont anou lo zimaz..

Swasantan apré, nou na linprésyon viv inpé lo minm mizik. Konmdi lo provérb : Shas lo natirél, li rovyin an galo. Mon sél rogré, l’ORTF zordi, la pa mont anou, si Madam Loiseau ék son Bijoux, la tir la lang pou gob in losti. Domaz, mwin noré vouli war sa. Antouka, pou wmin in shoz lé sir, Madam Loiseau la vol byin ba !

Pol