« Domoun dan lé bas i di ke zot i mange pi patate. Laisse la moukate là pou bone domoun i habite Mafate. Laisse a zot cozé, in zour kan manzé nora point, Kan zot bav va commence coulé, domoun dan lé bas va manz zot voisins. » ; Mézami kozman-la i sorte dann in shanté Ousanisava é mwin la trouv sa dann youtube dsi linternet. Mi trouv sa lé gayar vréman, mé mi pé dire li lèss pa la mémoire an ropo.

Pou kossa ?

Pars zot i koné konm mwin néna in gran sobatkoze la dsi. Néna sak i di, alon rotourn konm dann tan lontan, alon manze ravaze é néna lé zot i di konmsa sak ni manze ni pé fé pouss ali, produire ali, épi pa rèss vante vide kan bande ésploitère va désside in kou fé kriye noute vante vèk la fain… Mi rapèl in zour mwin la fé laba Sin-Pyèr in prédikassion dossi plantaz dori, é mwin la di sa sé la nouritire d’baze bande rényoné. In moune dan la sal la drèss mon kostime épi la di, sak mi di lé pa vré, pars koméla ni manz dori mé avan kossa nou téi manze ? Mwin la pa réponde pars néna in provèrbe i di konmsa : « I diskite pa avèk in kouyon, i done ali rézon ! », donk méssyé si mon dé-troi ligne i ariv dovan oute zyé, ou na rézon, pars mi done aou rézon.

Dann télé mi sorte rogarde dann zoinal parlé, in madame lé plantère é li l’aporte dann léstidyo in kantité plantaz lontan. El même i planté mé èl i di demoune si lé shère ashté pa, mé si lo pri lé abordab varyé zote fasson manzé ; manze pa d’ri toultan, manz manyok, sansa kanbar, sonz, épi obli pa toute kalité brède néna la Rényon, toute kalité frui. Sirtou obliye pa sa i pé zète bio é fère d’bien noute kor. Madame sé la rézon mème ki koze par oute boush é mi priyèr bondyé pou ké demoune i ékoute aou, i antande aou, pa san pour san-sa lé pa possib-mé in bon porsantaz, é sa lé déza bien. Madame wi koze d’or é d’arzan é sa i fé d’bien antande aou.

Pou mwin sa i rante dann programme dsi lotosifizans alimantèr - in pé i di lotonomi alimantère – é mi pé dire azot ala in n’afère lé bon pou noute l’avnir, lé bon pou noute santé... Bande shanté Oussanisava lé bon ossi pou noute santé, noute kiltire, pou afirme nout lidantité.. Alé ! alon shante in pé !