Mi koné pa si zot i souvien sak la spass moi d’novanm 2016 ? Dann tan-la bann zéspèr britanik épi bann shagosien té i travaye la min dann la min avèk gouvèrnman Gb pou trouv in solisyon pou bann shagosien gingn rotourn shé zot. Bann zéspèr l’avé propoz in plan, bann shagosien lété dakor é mèm gouvèrnman dann tan-la lété dakor.
Kèl té lo plan ? Lo rotour lété fézab é sirtou dann lil Diégo Garsya pars la baz militèr US épi GB i okip solman lo tier lil Diégo Garsya épi néna kouran, néna dolo, néna l’éropor épi tout komodité. Bann shagosien té kapab gingn travaye dsi la baz é anplis bien aranj zot landroi pou rotourné. Lo lansien promyé minis lété dakor avèk sa.

Mé kosa l’arivé ? Sinploman lo Brexit, la démisyon lo promyé minis épi la nonm in vyé shoval rotour konm promyé minis, madam Théréza May. Ala ke léspèss juman, i sava kont son bann zéspèr épi i di lo rotour la pa fézab mé va donn karant milyon liv sterling pou amélyor lo sityasyon bann shagosien sak i viv lil Moris, sak i viv Sédsèl épi london, élo do troi grin i viv d’ot ladroi.
I souvien Olivier lété La Rényon épi li la di : mète out plan o dyab, pars la pa sak ni vé. Lo droi in péi sa i vann pa épi i ashté pa. Lo pèp shagos la rofiz lo plan…sof inndé pli intérésé par lékime ké par poisson dan la mèr. Alor inn dé la aksèp lo voiyaz : i trap azot Moris sansa zot landroi, épi iamenn azot dé zour dann lotèl sink étoil laba dann Abou dabi.

Apré i amenn bann natif Diégo dann Diégo é bann natif lé zot zil dann landroi zot i sort. Aprésa, i anvoye azot dann salon pou rofé lé zong, épi dans dann salon bal. Fini lo sète zour i ramène azot Moris, sansa Sésèl, sansa london é sa i tir dosi lo karant milyon liv ster ling.
Kosa ? Ala ké zot arkomans zot truk apré lo réss trankil tribinal La Haye épi l’onu la donn azot. Madam Théréza, ou sé in san né ou ! Ala ké ou i arkomans out provokasyon épi out foutaz dé guèl. Sa i marsh pa sa ! La pa ditou sa ké bann shagos i vé. Lo rotour ? Sa i di pa ou késhoz sa ? Lé pa dfifisil konprann : sinploman répar lo krime out péi la fé kont bann shagosien. Lo droi o rotour ! Tir grinn zak dann out zorèye foutor !