Oté

Madégaskar i guéri pa in sèl malad avèk zot tizane mirak ! Asiz dsi ti ban don !

Justin / 19 mé 2020

JPEG - 43.6 ko

Mé zami, mi sava done azot inn-dé rézilta dsi lo covid-19 dann Madégascar. La pa pou done banna in shèk an blan. La pa pou dir azot mi pran sa konm parl lévanzil mé sinploman pou fé romark désèrtin si zot i di kékshoz lé pli préférab sa lé a popré vré, sansa i fo kant mèm donn bann shif kontradiktoir é pa déklar in n’afèr konm sèk moin la antann dann in zournal parlé dsi in radyo. La pa bézoin mi di lokèl, mé sak la antann moin lé sir zot lété shoké konm moin.

Donk lo zoinalis i déklar na poin okin malad i guéri Madégaskar é pandann tan-la, lo prézidan La répiblik malgash i pass son tan pou fé la piblisité pou in tizane banna la trouvé laba dann gran péi-la, gran konm La frans épi la Belgique réini. Kozman-la la fé tilt dann mon tète é l’èr ki lé, kan mi sava fé mon modékri, pou zoinal mardi mi di, dann mon kèr, m’alé rogard kosa L’express Madagascar i ékri par raport asa-par raport in kozman matraké konmsa.

Ala sak moin la trouvé. Ala bann shif ofisyèl bann z’otorité malgash i done pou lo 18 moi d’mé 2020 :
- konbien ka pozitif :322 .13 nouvo malad ospitalizé-1 form grav mé moin la vi kékpar lo malad lé désédé-Sink nouvo guérizon donk in total 179.-san soisnat dis nèf pèsone guéri é pa zéro konm moin la antann dann radyo.

Mi konpran i pé di si, i pé di la, i pé di finalman néna in bonpé malad gouvèrnman i koné mèm pa mé alé di néna poin in sèl gérizon. Ala in manyèr kalkil mantèr, in manyèr tronp demoun, é fé pran anou véssi pou lantèrne, po d’shanm pou pla kouvèr.. Ala in ma yèr atak lo tizane covics-organik bann syantifik malgash la trouvé épi zot la fine anvoye gratos dann plis vin péi. Pa La Rényo ! Isi ni pran médikaman blan nou !

Moin pèrsonèlman, mi sava pa anparl azot médikaman mirak, sèl trètman kont lo covid. Mi sava pa vant azot la kapasité nout bann frèr é sèr malgash. Mé mi pouré di kant mèm Madégascar i fé bann mask par milyon é d’apré sak i di néna rényoné i ashète sa par kantité. Mi pouré dir azot bann sitoiyin malgah i réspèk la plipar d’tan bann zèst sékirité. Mi pouré mèm dir azot bann malgash i pé sèrv modèl inn-dé péi sivilizé konm zot i apèl azot, zot mèm. Mé konm i di, ni vé ni vé pa, bodruch in zour sa i dégonf sa ! Tardra, viendra !