Plan-la sé pou gingn trape in randman 5 tone léktar dsi i sipèrfissi in milyon dé san mil éktar planté an ri an aplikan la métode P-dipping. Kossa i lé métode-la ? Lo poin inportan sé tranpe bande zènn plan pou ropiké dann in mélanz la boue épi langré fosfaté. Sa i pèrmète diminyé lo kantité langré (40 % a popré) épi goumante la prodikssyon 50 %.
Arzoute avèk sa in sélékssyon bande varyété d’ri, in diminission la somans épi la formassion bande plantèr par bande mètr-formatèr (80 par-la) épi bande plantèr-formatèr : 1606 pou trante mil plantèr dori.
In bon projé, bien avanssé, bien roganizé mé konm zot i romark sa la pa in prodikssyon bio…

Néna in n’ote métode, bio sète la — i apèl SRI (système rizikultur intansiv) in prètre lo père Laulanier avec son bande zékip la trouvé pou mète an plass - Témoignages la fine anparl sa plizyèr foi - i done in randman 8 tone an moiyène mé i pé alé ziska 12-15 tone é pa plass 20 tone léktar.
Problème : in gran kantité plantèr la pa suiv sa pars téi boulvèrs tro zot manyèr fèr épi zot tradission mé in métode koméla lé apliké dann bon pé péi. Lé domaze, mé lé souvan défoi konmsa kan in métode i paré tro révolissyonèr par raporla mantalité bande prodiktèr.

Antouléka Madégaskar lé an bone voi pou trape son lotosifizans an ri é lé bien nésséssèr zordi konm noute toute i koné — sirtou avèk in démografi konm sak èl néna (23 milyon d’moune zordi, pou alé ziska 43 milyon l’ané 2050 épi 100 milyon kan va trape lo 22éme syèk).

In bon formil : Konte pa dsu bato tonton pou travèrs la rivyèr — a bon ékoutèr, salu !

Justin