Oté

Madégaskar : in formasyon linjényèr solèr pou bann granmèr...

Justin / 10 octob 2020

JPEG - 43.6 ko

Plizyèr moi d’ran in bann granmèr Madégaskar la parti dann l’ind pou in formasyon linjényèr solèr. Zot néna par-la trant sink ziska soixante zané, zot néna poin zanfan a sharj é in lini vèrsité dann Rajastan avèk l’ède la WWWF pou aprann azot fabriké épi réparé bann ti zinstlasyon éléktrik dann désèrtin vilaz.

In trantène pèrsone la gingn formasyon-la dann Madégaskar mé lo gouvèrnman i domand ankor in formasyon pou désan soisant dis granmèr. Sé pou sa la WWWF épi gouvèrnman la désid fé in lékol formasyon Madégaskar mèm pou la formasyon bann granmèr malgash épi désèrtin péi l’afrik dé l’èst.

La fine pran la désizyon. La fine gingn lo finansman épi san tro tardé lo batiman va sort de tèr. Lo bann profésèr lé an formasyon zot osi. Donk sa sé in n’afèr i dovré trouv lo bout dann pa tro lontan.

Kosa sa i vé dir ? Sinploman si i vé fé lo lénèrzi prop néna moiyin é bann zaktèr in transformasyon konmsa lé shoizi pars zot lé bien angajé dann la vi zot vilaz é lé sir zot formasyon i tonm ar pa dann vid… Pétète sré bon nou osi ni agard projé-la avèk atansyon.

Avèk bann projé konmsa lénèrji prop va pran son plass é biento é firamézir léléktrisité prop v’ariv dann bann kanpagn avèk konm aktèr bann moun l’androi. In bon linisyativ : zot i pans pa ?