Oté

Madégaskar : katriyèm péi pou son résours natirèl, katriyèm péi pli pov : ziska kansa ?

Justin / 7 octob 2020

JPEG - 43.6 ko

Yèr matin moin la ékoute bann radyo é binsir zot téi anparl bonpé Madégaskar. Dizon téi di tout épi lo kontrèr d’tout, mé sa lé normal pou in péi gran konm Madégaskar, gran pou son sipèrfisi-La France+La Belgik réinis - gran par son popilasyon : 25 milyon dmoun a popré sète ané. Anplis néna la késtyonn lang, épi biensir néna la késtyonn kiltir ké nou kréol rényoné ni métriz pa. I fo pa ni obliy lo lizolman kiltirèl rant nou épi Madégaskar dopi in kantité d’zané.

Bonpé d’moun la pass kou d’fil pou dir koman zot i oi Madégaskar, mé dizon shakin la parl son madégaskar ali : in pé i koné solman Nosibé, in pé i koné Diégo, d’ot la kapital Tana, d’ot ankor Tamatav l’ansien nom pou Taomazina. In pé i koné lo sid, l’antandrouye. D’ot i koné l’il Sint Marie… Mi arète la pars zot i konpran bien sof pou trépé d’moun pou konète Madégaskar, son pèp, son bann kiltir, son bann problèm la pa in n’afèr fasil pou fé.

L’èrla, in pé i di : « La mizèr-la, i fo oir ankor si lé vré ! ».d’ot i di sé bann zétranzé k’i bénéfisyé tout rishèss lo péi néna. D’ot ankor i di sé pars bann sosyété i fé lo piyaz bann rosours lo péi. San obliyé sak anons tousa sé la fote bann politik… dizon lé konm kan i parl La Rényon. Dann tout lo bann kozman néna kant mèm in pé i di i fo ni ède nout bann frèr malgash épi n’a oir pli loin é san rode lo poikoi di koman. Pars o fon sé bann moun Madégaskar va trouv zot shomin galizé pa nou, pa bann kapitalis fransé é d’ot, pa bann kolonyalis néna ankor la min dsi lo péi-sorti par la port, zot la rant par la fénète.

Sak lé sir sé ké bann malgash i soufèr bokou dann sid par raport la soudir rant dë rékolt si tèlman difisil pou fèr. Lo prézidan la di li done ali in lané pou règ lo problèm lo Kéré avèk in pipe line pou amenn dolo, bann shomin i fo réparé, bann silo ddo ri, sorgo, manyok, patate i fo fé épi bann mézir d’irzans. Moin lé pa sir la grann mizèr bann malgasjh dann sid va fini vitman…la Sézon siklone i ariv ankor é kèl déga sa i sava fé ankor sète ané. La pandémie la pan kor fini. La moné malgash i fini