Dizuite zilyét, Nelson Mandela la gingn katrovin-onzan. In pé partou déssi la Tèr, bann moun sak i souvyin, sak i konfonn pa la mèr avèk l’ékime, la paye zariko avèk lo grin, moin lé sir, la pa mank an avoir in pansé pou in moun konmsa é sirtou pou la manyèr li la mète son pèp épi son péi anlèr, dann l’éstime demoun.

Son péi sé l’Afrik-di-sid... L’Afrik-di-sid ? Riyink antann so nom-la, na in koup de tan, té konm in malédiksyon. L’Afrik-di-sid ? Antann nom-la, zordi, lé konm in léspoir, in rékonfor, pou toute demoun déssi la Tèr... Nelson Mandéla la nyabou fini avèk in sistèm gouvèrnman si tèman in-himin !

Si ni souvyin byin, sète afèr-la noré pi fini dann in gran bin-lo-sang épi la fuite, légzode pou in gran kantité d’moun oblizé kite z’ot péi, la tèr z’ot bann z’ansète, l’androi zot mèm lé éné, pou éparpiy in pé partou déssi la Tèr... Dann l’Alzéri la éspass konmsa. Dann Ruanda la tyé d’moun tan-k’sé-t’asé. Dann d’ote péi galman. Dann l’Afrik-di-sid la pa éspass konmsa ! Dizon banna la gingn aboli l’apartheid é arète la guèr san tro fé déga, pou arzoinn la pé.

É poitan l’avé la ène dann kèr bann moun té i viv la-ba ! L’avé tan-é-tann moun té i souète pou tir vanzans. L’avé tan-é-tann zènmi la pé, an kantité, an poundyak.
Rozman l’avé galman in gran l’alyans té i apèl l’ANC, épi bann blan lété groupé dann in parti nasyonal. L’avé ossi in gran kantité pèrsone bone volonté. Mé, pars pou fé la pé i fo ète dë, l’avé in gran shèf blan té apèl Frédérick de Klerk. L’avé sirtou in gran-jéan, i apèl Mandela. Nelson Mandela !

Madiba, pou sak ou la fé pou oute péi, pou légzanp ou la doné pou partou déssi la Tèr, mi pans pa si in zour demoun va oubli aou !

Justin