Mi koné pa si zot la fine romark in n’afèr konmsa mé demoun i yèm krétiké. Sa lé vré sirtou dann ménaz. Mi koné in boug té i di son fam lé manyak kan té èl téi nétoiye lo kaz. Kan li la pran son rotrète li la di èk son madam : « A bien kalkilé mi trouv ou lé plito makote pars la propté é ou sé dé ! ». Lo madam la di ali fé, konmsa sa va tir in zépine dann son pyé. Komansman èl la trouv li té makote é konm li la fé in bonpé z’éfor pou nétoiye lo kaz èl la trouv li la vni manyak. Konm de koi ou i pé z’ète makote sansa manyak san z’ ète sinploman prop, san z’ète zamé konm ki fo. Alé ! Mi lèss azot rofléshi la dsi é ni artrouv pli d’van sipétadyé.