Mi pans zot I koné kosa i lé makro ? Pou komansé sé in poisson. I prétan dir demoun i manz pi tro sa mintnan mé mi koné, La Kaz, i manz sa kant mèm tazantan. Rarman ? Oui, mé i manz kant mèm é sirtou vi k’li na d’ sèl dann vant é ké li lé fimé, li gate pa.

Dakor ! Mé nout provèrb alors ? Moun makro, sa i anmank pa dann la sosyété ! Kisoi makro d’bor, kisoi makro d’komine, kisoi makro d’bitasyon, sansa d’ot kalité ankor. Makro, sé in ras san fin : li lé konm z’oignon, li lé miltipliyan konm k’i diré in zénérasyon éspontané é sak va tyé so ras-la, li lé pankor né.

Kosa zot i anpans ? Arien ditou ! Fé travay z’ot koko ! Fé bouy z’ot matyèr griz ! Zot va oir, ké, rant-rant, ni pé z’ète, tazantan, dakor rantre nou.

NB Kozman-la, moin la tir dann liv Daniel Honoré, i apèl « somi-lo-mo ». Mi trouv lé bien intérésan.