La rényon antièr lé an dèy, not tout lé an doulèr zordi. Koman ispouré èt otroman kan sink marmay la rényon i gingn la mor tou dinkou, sibitman si bor shomin é in ot i lit kont la mor zordi ? Pli gran laksidan la rényon la koni i prétan, o nonm de mor. San konprann, san prévni, tou dinkou sink i sava. Nou minm nou la finn konèt sa nou. La doulèr pèrd in zanfan, pèrd in kamarad osi. Konm sa minm nou la pèrd nout kamarad néna déza vinnsizan, zot va di, a zisto rézon na pwin tro rosanblans èk laksidan la mé tousala pou di sé la rout touzour, sé loto touzour lotèr. Ou dor la vèy, lo landomin ou révèy é la ou antan di, la rout la tié ankor, sa lé tro inzis baya. Zordi ankor kamarad la pokor romèt a zot. Konbyin d’fwa mwin la antandi di « Si boug la té ankor la, soré pa parèy »

Mé zordi mi vé sirtou pa port in zizman si pérsonn. koman la fé, kisa la fé, lér lé tro grav pou koz la boush rouvèr, mi vé sirtou pa koup dovan pou raminn mon frèz konm i di, fé konm si, fé konm sa, boudikont, pou fé lo prosé linn a lot, dot va okip a zot de sa lo moman véni. Pou mon par, mi vé dir bann paran marmay lé mor, la famy, bann zami, bann konésans, mi vé di a zot, mi partaz zot doulèr, mi pran par zot malèr an so moman. Sirman i dwa èt dir pou zot. Pou bann marmay lékol osi mwin néna in pansé. Fransh vérité, mi trouv so laksidan la i dovré fé réfléshi a nou in pé. Si nou minm nou na pwin ryin pou roprosh a nou, si nout kèr lé klèr dovan tousa.

Néna bokou d’késtyon y rovyin, si loto, si la rout, si la vitèss, si lalkol… Solman in sèl lékzanp si la rout, éské nout rout lé kalibré pou tousala loto, i prétan néna vinmil loto i rant tou lé zan, disi sinkan va fé plis de san mil é i fé pa in sèl morso la rout an plis, san konté sak néna déza dopi lontan. Nou nora lokazyon rovni la d’si, mi donn solman inn ti lékzamp, parské a vré dir, noré bokou plis dé shoz a dir, in takon minm. Zot i romark, mi koné pa poukoué, tousala i tonm touzour si nout zénèss. Mé malérozman in doulèr pou nout tout.