Mé zami mi pans zot i koné sète ané maloya néna dizan té klasé konm patrimoine l’umanité. Si ni artourn in pé an aryèr, néna dizan Paul Vergès lété Prézidan konsèye réjyonal é li té apré lans la mézon bann sivilizasyon(MCUR). Dizan lé long épi lé kourt konm zot i koné, mé si ni artourn dizan an aryèr, si ni fé roviv in pé l’aktyalité ni romark dann tan-la si maloya l’avé son partizan, li l’avé osi son bann z’advèrsèr-dizon ni pé mèm di son bann z’ènmi. Nou la mèm konète lo tan in pé téi mont séga kont maloya é téi done maloya tout sort kalité d’nom.

In romark kant mèm : bann partizan séga kont maloya la pa fé granshoz pou fé rokonète séga an parmi lo patrimoine l’umanité. Moin pèrsonèl, mi pans sa lé rogrétan pars, sa sé kékshoz néna in valèr artistik, in valèr kiltirèl, in konpozant la kiltir popilèr nout péi - in valèr pou nou é pou l’umanité vi ké é fransh vérité li fé parti lo patrimoine mondyal é konm i di souvan la tèr sé in gran vilaz lé pa normal obliy désèrtènn konpozant la kultur konm sa.

Sèl zafèr mi pé dir sé ké tout sak la vanj pou mète maloya anlèr zot l’avé bien rézon é sa i romont loin : sa i romont dann tan té i fé maloya dann kann, téi fé maloya dann la kour épi téi mobiliz demoun avèk shanté maloya… Moin lé sir in pé va domann pou kosa mi rapèl tousala . Mon répons lé sinp : la vérité istorik i doi touzour ète défandi, ziska k’èl i ranport la viktoir li mérite bien, sanm pou moin.

Mé astèr, pou kosa mi anparl sa zordi ? Pars konm zot i koné in jenn marmaye Sintandré la shante maloya épi li la la fé rokonète la valèr son shanté épi nout shanté. Soan sé son nom é li la shant in maloya ropriz JC Viadere épi son group Maloya « Si la plui li vé tonbé »… Ni pé ké bate la min mé ni obliy pa maloya fitintan lété konm rézèrvé pou bann péstiféré la kiltir rényonèz.