In pé péi nana in listoir long mèm : i kont an milié d’zané, dis, vin, trant, défoi plis ké sa. Défoi, sé bann gran péi.Défoi,sé bann ti péi, dann in gafourn ni koné mèm pa lo nom. La plipar d’tan zot nana in patrimoine pliské konsékan.
Na in pé péi, listoir lé kourt, dé-troi santène z’ané : kisoi bann gran-gran péi, kisoi bann ti : in galé dan la mèr, sansa in poin déssi la kart zèografi. In pé i di, sa bann péi na poin listoir, sa la poin la kiltir, sa la poin patrimoine.
Konm nou alor ? Vik na mèm poin la tonm in zésklav, mèm pa dann tan-la in moniman pou z’ot mémoir. Parl pi bann soubasman z’ot kaz, in grot avèk déssin pène, in réstann sal de bin. Zot la pa lès arien pou nou, ou bien près pa arien.
Près pa arien ? Sa lé pa sir. Lé vré, zot la pa lèss in patrimoine k’i gingn rogardé, toushé, santir an passan lo doi dsi, mé kissa la lèss sirandane, zistoir nout vié famiy la rakont anou, épi la gramèr nout lang... Kissa la kit maloya (1) pou nou ? Sa mèm i rant dann nout patrimoine, sa mèm i rant dan nout kultur.

(1) Françoise Vèrgès i vienn dir la MCUR l’apré fé in mouvman pou fé klas maloya konm patrimoine l’humanité.Ala in bon nouvèl

Justin