Zot i koné la-ba, dann lopital Sin-Pyèr, la désid nonm « Maloya » in sèrvis i okip maladi mantal. Na in group la di, sa in n’afèr i fé pa pars nout maloya la pa in maladi mantal épi la domann k’i tir lo nom-la. Na d’ot la di pèrsone lé propriyétèr lo nom maloya é bann malad la bien lo droi z’ot sèrvis i apèl konmsa.

Fransh vérité, avan pran in désizyon konmsa i fo bien kalkilé pars si ou i fé konm l’arivé ou i pé fé lèv la gèr. Zot i oi la pa manké ! Pars, promyèrman nana in propriyétèr maloya é propriyétèr-la sé lo pèp rényoné é lo maloya i fé bien parti lo kiltir rényoné. Konm di lo shanté : « maloya, la pa nou la fé, sé nout z’ansète la fé maloya » donk sa i fé parti nout patrimoine, mèm plis ké sa i fé parti l’am lo pèp rényoné. Maloya, nout rasine !

Arzout èk sa kan i di maloya osinonsa kabaré, nana la-dan in koté rolijyon : in ga la di amoin sé l’èr nout l’am i artrouv l’am nout bann z’ansète é mi konpran ali bien kan mi romark l’éspri i mont dsi bann maloyèr. Donk si ni vé bien oir lé shoz, nou la pi dann in mond tèr-a-tèr mé dann in mond si zot i vé ni pé apèl ali mistik. Moin pèrsonèl mi konpran sa konm k’i diré in n’ot dimansyon… Mi arzout èk sa, nout maloya la tienbo la min la lite lo pèp rényoné dann son bann konba : konba pou alé dann maronaz, konba kont l’ésploitasyon, la lite kont lamizèr, la lite pou nout libérasyon… é tout bann lite noula améné, é sak i rès anou ankor pou améné.

Lé vré in pé kla nonm z’ot ri konmsa, d’ot z’ot limonad, d’ot z’ot bonbon, in pé la pans an tournan z’ot korpyon zot va fé rant sa l’inésko - konm lo kok i kroi kan li shant sé li k’i fé lèv solèy ! - mé l’inésko i travay pa konmsa l’inésko i travay sèryé pars maloya sé in n’afèr sèryé konm mi pans moin l’amontr an-o la. Tro sèryé pou manyé ali konm in gadzète, konm in koulèr lokal, si sé konmsa k’in pé la fé.