Maloya sé t’a nou ! La MCUR ossi, in zour, sar t’a nou !

6 mars 2010

Moin lé an rotar ! Konm d’abitide ! Mi fé parti so bann moun k’i konfon l’èr pou sort z’ot kaz avèk l’èr zot randé-vou. Mi déside tinn télé épi démaré. A ! zournal TF1 i parl déssi bann zinstriman la mizik... mi pé pa mank sa ! Tan-pir si moin lé an rotar. M’a di moin té pri dann lanboutéyaz : pèrsonn i kroi ar pa, mé i di ar pa aryin non pli. Aa ! Moin la byin fé d’aspéré. Banna i parl déssi kayanm é déssi maloya, déssi lo malèr bann zésklav, déssi zot malèr é déssi zot révolt, épi zot shanté zordi patrimoine imatéryèl pou l’UNESCO. Sa i toush amoin pou vréman...
Dalone, dalon, zot i trouv pa sa inkroiyab zot ? In mizik domi-mor la trouv moiyin résisité… la trouv moiyin ète koni par toute Rényoné, gran konm ti, zène konm vyé, ziska k’i dans sa dann salon bal épi dann sérémoni malgash, épi ankor dann rényon politik, pran lo vol konmsa… ziska la-ba déor, ziska l’Érop, ziska pli loin, ziska klass ali dann patrimoine l’imanité. Ni rann anou byin kont konm sa lé inkroiyab ? Ni rann anou byin konte konm sa lé kaziman in mirak ?
Kissa la porte zanfan-la déssi kivète dolo pou son batème intèrnasyonal, pou son klasman dann patrimoine mondyal ? La MCUR la nyabou fé sa : i fo pa ni oubliy. Maloya sa t’a nou sa ! Sa sé t’a nou ! La MCUR ossi sar t’an ou galman, in zour i apèl domin… moin na konfyans.

Justin


Signaler un contenu

Un message, un commentaire ?


Témoignages - 80e année

La pès kabo

5 juillet, par Christian Fontaine

Kan i ariv Novanm-Désanm-Zanvié, domoun i réziste pi ek la salèr. Zène-zan i mars dann somin, zène-fi i roul an dékolté ; sétaki i rod in manir po (…)


+ Lus