Oté

Mandela Day 2019 : kan in zéan la rézistans an shanson la parti rozoinn lo éro son péi Nelson Mandela

Justin / 19 zwiyé 2019

JPEG - 43.6 ko

Yèr lété dizuit zilyé : in zour inportan pou l’imanité. Pou kosa ? Pars zour-la i apèl Mandela Day-lo zour Mandela - é sé lo roganizasyon bann nasyon ini (l’Onu) la désid dédyé zour-la pou lo gran konbatan l’afrik du sud dizon lo gran konbatan mondyal. Vi ké Nelson Mandela la ansèrv soisant-sète zané son vi pou vanj pou son péi é sirtou pou éfas in réjime rasis téi apèl l’apartède-, la domann shakinn done soisant sète minite son tan pou fé in n’afèr pou ède limanité pou pou soulaz la mizèr d’moun.

In bone intansyon sa lé sir, mé néna si tèlman la mizèr dsi la tèr, mé demoun lé si tèlman okipé pou règ z’ot problèm pèrsonèl zour-la lo mond i obliy souvan dé foi. Pou done soisant sète minite son tan, dabor i fo ou lé o kouran é biensir néna in pti trépé d’moun lé o kouran.I fo galman sé in n’afèr roganizé kisoi par bann gouvèrnman-souvan dé foi résponsab la mizèr d’moun-, kisoi par bann ONG (zorganizasyon non gouvèrnmantal).

Mé si ni rofléshi bien sak l’Afrik di Sid la fé la pa in n’afèr ordinèr : bate atèr in réjime rasis é lé normal sé in moun konm Mandéla i roprézant lo sinbol labolisyon in réjime konmsa. Zordi li lé mor é mèm si son péi lé ankor dann difikilté ni pé di pèrsone i sava pa obliy de sito in l’évènman inportan konmsa.

Arzout avèk sa konm pou rapèl anou la disparisyon Nelson Mandela, in n’ot jéan la mizik la rézistans la parti avan-yèr 17 Zilyé sé Johnny Clegg l’om demoun téi apèl lo zoulou Blan é li la désote la vi apré in long maladi … Kisa la pa vi diu you tube lé dé zéan réini laba dann l’almagn dann in konsèr kan Mandela la vni dsi la sène pou arjoinn lo shantèr blan-konm pou bien marké l’apartéde lé bien fini.