Mézami, néna in proverb la lang bande franssé i di di konmsa : « La pomme ne tombe jamais très loin du pommier. » é d’apré sak mwin la lire i vé dire mèm shoz ké « lo shien i fé pa lo shate ».

Konm nou-mon bande léktèr épi mwin mèm épi bande rényoné an zénéral – nou lé kiltiré késtyon provèrb lé pa difissil pou nou konprande in kozman konmsa. Sa i vé dire, nou lé konm ni lé, pars nou la suiv noute zénitère dann sans larz.

Ni pé z’ète zanfan noute paran, zanfan noute famiye, mé galman zanfan in sistème, zanfan in kiltir, in sossyété. Sa i vé dire ni sava pa rode tro lwin sak lé bien épi pa bien an même tan ! Ni pé z’ète travayèr, sansa parèss, ni pé z’ète zantiy, sansa mové konm la gal, kouzin zèrmin sansa pinèze morpin, ni pé rode réissir, konm pa z’ète la èk sa.

Alé ! mi arète tèrla, é mi kite azot rofléshi la dsi épi si zot i gingn kass la lojik si la bézwin kassé. Ni artrouv pli d’van, sipétadyé.