Oté

« Mang mir i pé rès dsi l’pyé, mang vèr i pé tonb atèr »

In kozman pou la rout

Justin / 30 octob 2017

JPEG - 43.6 ko

Kozman-la la pa in kozman rényoné. An touléka moin la zamé antann di sa, isi mé pé s’fèr isi galmn i di sa, sansa na in n’ot manyèr pou di lo mèm z’afèr… I paré kozman moin la mark an-o la, sa sé in kozman bann z’antiyé. Sans prop ni konpran toutsuit kosa sa i vé dir mé sans figiré ? I parétré sa i vé dir na poin in loi d’natir vré san pour san : in vyèy pèrsone i pé kontinyé viv é in jenn moun i pé sote l’ot koté la vi... Moin l’avé in gran-pèr la viv lontan épi li téi sava souvan dé foi l’antèrman é demoun téi mank pa fé romark ali li lé ankor-la. Li té i yèm pa sa é in zour li la fé in répons pou l’okazyon té paré dann son tète dopi lontan. Li la di : « Na plis zènn bèf i sava l’abatoir ké bann vyé ! ». Alé ! Mi lèss azot réfléshi la dsi é ni artrouv pli d’van sipétadyé !