Mésyé, médam, la sosyété mi pans pa zot i koné provèrb-la.Mi pans pa sa in provèrb rényoné é sré plito, sanm pou moin, in provèrb bann zantiyé. Solman sa i vé pa dir na poin kozman parèye isi shé nou konm laba dann zantiy.

Sa i fé rapèl amoin, mon vyé gran-pèr :in zour li la parti in lantèrman é in moun la di ali : « Ou lé ankor la don ? »-in manyèr dir , mi kroyé ou lété mor.Mon gran-pèr lété fine prépar son répons é li la di : « I sava plis zenn vo l’abatoir ké bann vyé bèf. »

In manyèr pou dir laz la mor la pa programé sa é lo moun la lans ali lo kozman moin la marké lé posib i sava avan li, mèm si log a té anko jenn. In pé i mor étan jenn, d’ot étan vyé, mé toulmoun i sava kan son l’èr i sone.

Sa lé obligatoir sa ! Alé ! Mi kite azot rofléshi la dsi é ni artrouv pli d’van. Sipétadyé !