Moin la vi dann télé in drol manifèstasion. La pa sèt bann z’anploi vèr ! Banna lé près mil. La promèt azot va fé dir in pé zot kontra épi toudinkou i di azot na poinn solision pars l’Éta i vé pa. Sa in drol z’afèr pars na poin tro lontan, l’avé promèt azot trouv in solision. Nana pou di la dsi, mé la pa sa mi vé anparl zordi.

Mi vé anparl in manifèstasion la fé dann Sin-Pol, si mi tronp pa dan la ri d’Komèrs, sansa koté l’ansien zandarmri. Kisa la fé manifèstasion ? Bann komèrsan épi bann z’élu la komine, promié l’adzoin an tèt. Pou kosa la manifésté ? Pa pou k’i gard lo RSTA, sansa la prime COSPAR, mé pars l’Éta la désid fé in sant pou l’édikasion bann jèn nana difikilté pou trouv zot plas dan la sosiété. Kosa banna la pèr ? Zot la pèr sa i fé d’tor zot komèrs. Zot la pèr osi pou l’insékirité an plin dann milié la vil. Kosa i pé di la dsi ? Pétèt zot na rézon an avoir pèr, ou sinonsa zot na tor... Pars i di, dann Sin-Dni na in sant konm sa, é ziska zordi, moin la pa antann la fé dézord plis ké sa. Mèm si mi pans, dann fon mon kèr, bann mézir l’édikasion i pé pa fé mirak.

Astèr, na in n’afèr i zèn amoin. Désèrtin bann jèn lé dann difikilté, in pé mèm i tonm dan la délinkans. Sa sé in vérité ! Mé kisa l’otèr ? La fot bann jèn, la fot zot famiy i ésèy fé in n’afèr é i gingn pa... ou sinonsa la fot nout sosiété i marsh an défalké ? Zot i pans pa, sé la fraktir an dé dan nout sosiété lé résponsab in n’afèr konm sa ? Donk, pou moin, bann jèn-la, sé bann viktime... L’èr-la, kosa i fé avèk zot ? I fo mèt azot dann in rokouin par la, tèl fason k’i oi pa zot, tèl fason na poin kontak èk zot. Mi pans pa sa sé in solision. Touléka, sa in mové solision ! Moin la antann lo promié adzoin apré di son bann kozman dann mikro. Son boush lé a li, li di sak li vé ! Pétèt gouvèrnman va pran in pé pou son grad, mé sak lé sir, sé ké bann marmay èk zot famiy va prann bonpé pou zot. Zot va pans i tap dsi zot an promié, i tap dsi bann fèb an promié... Tap dsi bann fèb ? Dsi bann viktime ? Mi trouv sa in drol l’imanism... in l’imanism a l’anvèr !

NB : Sinonsa i mank amoin dé mo l’ésplikasion pars moin na l’inprésion in pé la fé zot shoi, é mi kroi pa sé lo bon shoi.

Justin