Kan mwin la antande sa dizon mwin la ankéssé mé fransh vérité mwin té i vé sirtou fé la promosion pou la kiltir dori é mi kontinyé. Mé aprésa mwin la parti fouye in pé dsi l’internet é mwin la romarke in n’afèr la plantassion patate avèk maniok la shanj in bonpé, la mèm mékanizé, é mèm la transformassion ravaze dann plizyé péi l’afrik la avanssé.

Pou l’instan mwin la ropère in transformassion manyok an farine, épi an tapioka. Mwin la vi kékpar té i sava pli loin avèk la transformassion lékors pou done manzé zanimo. Si tèlman bande madame in pé partou dann l’Afrik tropikal i ansèrv bande produi transformé pou ramenn in pé dé sou dan la famiye.

Nou issi La Rényon, pandan lontan nou téi manj brède maniok avèk salé sansa boukané nou téi manz manyok o suk épi manyok sèl, la grèss, poiv. De tou tan i fé gato manyok épi i fé gato patate. Mé zordi, lé shoz i shanj in bonpé. Mwin la fine anparl do pain avèk la poude manyok san pour san, sansa do pain la poude manyok é la farine do blé mélanjé.

Mézami, sa i fé panss amwin in n’afèr, sé bien tienbo anou o kouran sak lé zot ke nou i fé é konmsa lé sir ni zap arpa in progré sansa in l’évolission. Mé lé vré kan wi gouvèrne pa ou par ou mèm, lé pa rar wi rate lo progré é sa la pa bon.

A bon antandèr, salu.

Justin