Sak i koné kozman-la, i koné ! Sak la fine obliyé, la fine obliyé ! Mi koz pou sak la fine bliyé épi pé s’fèr i konpran pa vréman sak kozman-la i vé di. Mi pans kozman-la néna in bon sans épi in mové sans dan lo ka néna in l’égzazérasyon. Lo bon sans sé kan i di manzé kui i fo partazé. Donk si in moun i ariv out kaz lèr déjéné, i fo pa lèss ali alé vant vid é kant mèm in pti boushé i fo done ali. Koméla, dan sosyété demoun i fé ropa partajé : shakinn i amenn sak li gingn épi li profite tout sak néna é mi trouv sa in bon z’afèr.. Astèr, si ou i ariv a égzazéré, si par ébzanp ou i rouv la port in pti kuizine demoun é ou i sèrv aou dann son marmite-ziz pi si ou i dévir marmite aprésa : l’èr-la mi pans pa kozman moin la mark an-o la lé vré toulbon. Dann in ka konmsa ou sé in volèr d’manzé é in poin sé tou. I paré dann tan la bann Sitarane, apré, sansa avan fé zot bann krime zot té i pass marmite an revu é fransh vérité, dann in ka konmsa, nout kozman pou la rout zordi i aplik pa. Alé ! Mi kite azot rofléshi la dsi é ni artrouv pli d’van. Sipétadyé !