Médame, méssyé, la sosyété koze èk mwin sé koze èk in kouyon, mé sé o pyé d’lo mir k’i oi lo vré masson.

Mézami néna lontan mi tourn épi mi rotourn kozman-la dann mon tète pars mi oi pa kossa sa i vé dir toulbon, oussa sa i sorte, dopi kan i di kozman-la issi La Rényon. Mwin la fine domande mon bande dalon, mé san rézilta-néna bien sak i tradui lo motamo mé mi trouv pa sa lé valab.

Tazantan mi ansouvien lo tan mwin lété marmaye dann mon vilaz demoune lété pov konm Job dsi son ta fimyé. Donk mi rapèl lékol boi d’Nèf : néna téi manze la kantine é néna d’ote non, mé mi souvien bien l’avé toultan in pé plis manjèr ké lo nonb lété inskri. Mi rapèl ossi kan inn-dé zélèv lété fèb, la diréktriss téi anvoye avèk madame Baba-la kizinyèz – pou boire lo d’sèl épi manze in gazon.

Dsi shantyé bande travayèr partaz manzé. E zot i di konm bienvénu pou inn é l’ote : « alon fère ! » Koméla i fé ropa partaz é mèm sak la pa amenn arien i pé ranpli son boujaron. Mi rapèl ankor kan mwin la fé mon mézon é ké l’ariv l’èr pou rante dedan, in dovinèr mi koné ali, la di amwin : kan v’ariv l’èr manzé in pèrsone v’arivé é i fodra tire in zassyète manzé pou li.. Bin kossa l’arivé zour-la ?

Mi kite azot doviné é ni rotrouv pli d’van. Sipétadyé.

* In kozman la solidarité.

« Manje kwit pa gen mèt » : provèrb haïtien