Matant Zélida la ékrir Justin :

Mon shèr nové, mon spès salté, rouj de fon dovan l’étèrnité,
Moin lé sir ou sar dakor avèk moin pou komansé sirman… apré i rès a oir...! Donk ala sak moin na pou ékri aou zordi : in médiatèk, sa in n’afèr inportan dann in vil. Toulmoun i pé oir bann marmay alé rod liv, sansa cd, sansa d’ot produi kiltirel anndan. Toulmoun i oi bien sa sé in poin pou la zénès rasanblé. Lé myé sa plito k’in bivète, sansa in boushonn zamal. Ou lé dakor avèk moin ziska isi ? Pétète astèr va shanjé. Pou koué ? Pars mi antann pa zot tro, zot bann rouj-de-fon dsi la késtyonn la médyatèk Sin-Pol. Pou koi ? Pars pétète sé madam Bélo la mète an rout projé-la é konm zot i manj pi in grinn sèl avèk li, zot i intérès pa. Méyèr z’afèr vénan d’li, lé amèr, lé ak, lé vilin. Mi antann pa zot dir i fo siprimé, mé zot i fé konm si zot i di, li na ka ansort ali tousèl. Mi pans i pé ète pour, i pé ète kont mé l’indiférans sé lo pli mové poin. Tok ! Pran sa pou toi !

Justin la fé pou répons :

Mon vyé matant k’i koz touzour la boush rouvèr,
moin lé kontan antann aou parl la kiltir konmsa pars moin l’avé plito l’inprésyon la kiltir laté pou ou in gaspiyaz l’arzan. Pou kosa mi di sa ? Pars kan La Réjyon dann tan Paul Vergès l’avé lans projé la mézon dé sivilizasyon é l’inité rényonèz- in gran projé kiltirel. Mi souvien bien in bann pintad la mète a kakayé dsi sa. Mi souvien pa ke désèrtin la mont dsi barikad pou in n’afèr konmsa. Mi souvien mèm désèrtin la di sé pa zot projé vi k’la pa diskite èk zot la dsi. Donk, parl pa li dsa... Alé oir sa sé in projé Parti kominis té i port dopi avan Paul Vergès lété prézidan la réjyon. Donk mi trouv dé sèrtinn kritik lé mal fondé. L’èr-la, sanm pou moin, la kiltir sé in n’afèr tro inportan pou nouri la popilarité d’moun ou sinonsa pou règ in kont avèk in moun… Mi sava pa dir mon kèr i sègn pou la mcur..., mé m’a touzour pans avèk rogré La Rényon la pass a koté in z’afèr plis k’inportan. Lé vréman rogrétan pou vréman. Tok ! Pran sa pou ou !.

 Justin